उन्हाळ्यात वर्षभरासाठी बनवून ठेवा झणझणीत आणि चटपटीत दही मिरची; पाहा सोपी रेसिपी

उन्हाळ्यात घरोघरी महिला कुरडई, पापड, सांडगे वर्षभरासाठी तयार करून ठेवतात. त्यासोबत दही मिरची हा देखील पारंपारिक पदार्थ तुम्हाला तयार करून ठेवता येईल. दही मिरची बनवण्याची रेसिपी खूप सोपी आहे. त्यासाठी जाडसर तसेच मध्यभागी फुगीर असलेल्या मोठ्या हिरव्या मिरच्या घ्या. यामध्ये दह्याचे सारण भरता येईल, अशा मिरच्या हव्या.

जिरे पूड, धणे पूड, चवीनुसार मीठ दह्यात घालून ते मिक्स करून चांगले एकजीव करून घ्या.

हिरव्या मिरच्या धुवून त्याच्यावरील पाणी पुसून मग विळी किंवा सुरी तुम्हाला जे सोईस्कर वाटत असेल त्याने मिरची मधोमध कापा.

मिरची कापताना दोन तुकडे होणार नाही याची काळजी घ्या. कारण यात दह्याचे सारण भरावयाचे आहे.

सर्व मिरच्या कापून झाल्यानंतर त्यामध्ये हाताने दह्याचे सारण भरा.

फोटोत दाखवल्याप्रमाणे हिरव्या मिरचीत दह्याचे सारण भरून नंतर ती त्यामध्ये बुडवून काढायची आहे. जेणेकरून ती पूर्ण पांढरी दिसेल.

या मिरच्या एका पातेल्यात जमा करून रात्रभर या दह्यात भिजत ठेवा.

दुसऱ्या दिवशी सकाळपर्यंत दह्याला पाणी सुटले असेल. हे पाणी वेगळे करा.

नंतर एका ताटेत या मिरच्या थोड्या थोड्या अंतरावर ठेवून त्या कडक उन्हात वाळवा.

उन्हात कडक वाळल्यानंतर झणझणीत आणि चटपटीत दही मिरची तयार आहे. या मिरच्या तुम्ही हवाबंद बाटलीत भरून ठेवा. पाहिजे तेव्हा जेवणासह चवीसाठी खाऊ शकता. त्या वर्षभर चांगल्या राहतात. मात्र, उन्हात अतिशय कडक वाळायला हव्या.