Jio नंतर Airtel, VI चाही धक्का! दरवाढीची केली घोषणा

लोकसभेच्या निवडणुकीचे निकाल जाहीर होऊन नवे सरकार सत्तारूढ झाल्यानंतर महिन्याभराच्या आत दूरसंचार कंपन्यांनी मोबाईलच्या दरवाढीचे धक्के मिळायला सुरुवात झाली आहे.
संग्रहित छायाचित्र
संग्रहित छायाचित्र

मुंबई : लोकसभेच्या निवडणुकीचे निकाल जाहीर होऊन नवे सरकार सत्तारूढ झाल्यानंतर महिन्याभराच्या आत दूरसंचार कंपन्यांनी मोबाईलच्या दरवाढीचे धक्के मिळायला सुरुवात झाली आहे. गुरुवारी रिलायन्स जिओने मोबाईलच्या दरात १२ ते १५ टक्के वाढ करण्याची घोषणा केल्यानंतर अवघ्या एका दिवसानंतर शुक्रवारी (२८ जून) भारती एअरटेलनेही मोबाईल दरांमध्ये १० ते २१ टक्के वाढ जाहीर केली. नवे दर ३ जुलै २०२४ पासून लागू होतील. कंपनीच्या या घोषणेनंतर पोस्टपेड आणि प्रीपेड दोन्ही प्लान महाग होणार आहेत. जिओ आणि एअरटेलनंतर आता व्होडाफोन आयडिया देखील दरवाढ करण्याची शक्यता आहे.

एअरटेलचा १७९ रुपयांचा सर्वात स्वस्त प्लॅन १९९ रुपयांना होणार आहे. त्यामध्ये २८ दिवसांची वैधता, अमर्यादित कॉलिंग आणि २ जीबी डेटा मिळतो. तर २६५ रुपयांचा प्लॅन २९९ रुपयांना मिळेल. त्यामध्ये अमर्यादित कॉलिंग आणि २ जीबी डेटा दररोज २८ दिवसांच्या वैधतेसह मिळेल. एअरटेलने म्हटले आहे की भारतातील दूरसंचार कंपन्यांसाठी आर्थिकदृष्ट्या मजबूत व्यवसाय मॉडेल सक्षम करण्यासाठी प्रति वापरकर्ता सरासरी महसूल, म्हणजे एआरपीयू ३०० रुपयांपेक्षा जास्त असणे आवश्यक आहे. आम्ही एंट्री लेव्हल प्लॅनमध्ये दररोज ७० पैशांनी वाढ करत आहोत.

रिचार्ज प्लॅनमध्ये वाढ झाल्यामुळे एअरटेलचा शेअर्स आज विक्रमी उच्चांकावर पोहोचला आहे. व्यवहारादरम्यान शेअरने १,५३६ रुपयांची पातळी गाठली. तथापि, सध्या तो ०.७६ टक्के घसरणीसह १४६४ रुपयांवर व्यवहार करत आहे. या वर्षी शेअर्स तब्बल ४४ टक्के वाढला आहे.

दूरसंचार कंपन्यांनी नोव्हेंबर २०२१ नंतर प्रथमच दरांमध्ये मोठी वाढ केली आहे. सरासरी वापरकर्ता महसूल वाढवणे हा त्याचा उद्देश आहे.

तज्ज्ञांचे म्हणणे आहे की दूरसंचार कंपन्यांनी 5G सेवांमध्ये मोठी गुंतवणूक केली आहे. उदाहरणार्थ, जिओ आणि एअरटेलने 5G सेवा सुरू करण्यासाठी २ लाख कोटी रुपयांहून अधिक गुंतवणूक केली आहे. परंतु अद्यापपर्यंत त्यांना या गुंतवणुकीवर परतावा मिळालेला नाही.

मे महिन्यात एअरटेलचे एमडी गोपाल विट्टल यांनी सांगितले होते की, उद्योगांना रोजगाराच्या भांडवलावर परतावा वाढवण्यासाठी दरांमध्ये मोठी वाढ करणे आवश्यक आहे. मोबाईलच्या दरासोबतच ब्रॉडबँड सेवेच्या दरातही वाढ करण्यात आली आहे.

VI चेही मोबाईल दर महागले

मुंबई : दूरसंचार क्षेत्रातील स्वस्ताई आता संपली आहे. दूरसंचार कंपन्या रिलायन्स जिओ, भारती एअरटेलनंतर आता वोडाफोन आयडिया ‘व्ही’ने आपल्या पोस्टपेड व प्रीपेड दरात वाढ करण्याची घोषणा केली. कंपनीने सर्व प्लॅनमध्ये ११ ते २४ टक्क्यांची वाढ केली असून ते दर ४ जुलैपासून लागू होतील.

२८ दिवसांच्या प्रीपेड प्लॅनसाठी १७९ ऐवजी १९९ रुपये, ८४ दिवसांच्या प्रीपेड प्लॅनसाठी ७१९ ऐवजी ८५९ रुपये, वार्षिक प्लॅन २८९९ वरून ३४९९ रुपये केला आहे. तर ३६५ दिवसांची वैधता असलेला २४ जीबी डेटाचा प्लॅन १७९९ रुपयांना मिळणार आहे. त्यात कंपनीने कोणताही बदल केलेला नाही. ग्राहकांच्या विविध गरजा लक्षात घेऊन कंपनीने या प्लॅनची आखणी केली आहे.

logo
marathi.freepressjournal.in