नवी दिल्ली : वायू प्रदूषणाच्या चिंताजनक परिस्थितीमुळे राजधानी दिल्लीत डिसेंबर महिन्यात सर्व शाळांना दिल्या जाणारी हिवाळी सुट्टी एक महिना आधीच देऱ्यात आली आहे. यामुळे आता ही सुट्टी ९ ते १८ नोव्हेंबर या कालावधीत दिली जाणार आहे. दिल्लीच्या शिक्षण संचालनालयाने बुधवारी एका परिपत्रकाद्वारे हे घोषित केले आहे. यापूर्वी हवेच्या खराब दर्जामुळे ही सुट्टी ३ ते १० नोव्हेंबर अशी घोषित करण्यात आली होती.
दिल्लीतील हवेच्या चिंताजनक दर्जामुळे जीआरएपी-४ च्या धोरणांची अंमलबजावणी करण्यासाठी आणि अशा प्रकारच्या वायू प्रदूषणाच्या गंभीर स्थितीबाबत भारतीय हवामान विभागाने सुधारणा होईल, असे सांगितलेले नाही. हिवाळी सुट्टी २०२३-२४ साठी म्हणूनच आधी घेतली जात आहे. त्यामुळे शाळा पूर्ण बंद राहतील तसेच शिक्षक व विद्यार्थी यांना घरी राहता येईल, असे या परिपत्रकात म्हटले आहे. दिल्लीचा एअर क्वालिटी निर्देशांक ४२१ नोंदला गेला आहे. मंगळवारी दुपारी ४ वाजता तो ३९५ होता, तेथून तो या स्तरावर आला आहे.
