पंतप्रधान नरेंद्र मोदी आज १७ सप्टेंबर रोजी, आपला ७५ वा वाढदिवस साजरा करत आहेत. या दिवशी सोशल मीडियावर शुभेच्छांचा वर्षाव होत असताना, दक्षिणेतील चित्रपटसृष्टीतून मोदींना एक मोठं सरप्राईज मिळालं आहे. त्यांच्या जीवनप्रवासावर आधारित भव्य बायोपिकची घोषणा करण्यात आली आहे. 'सिल्वर कास्ट क्रिएशन्स' या निर्मिती संस्थेकडून 'मां वंदे' या चित्रपटाचे अनावरण करण्यात आले असून यात मलयाळम अभिनेता उन्नी मुकुंदन नरेंद्र मोदींची भूमिका साकारणार आहेत.

उन्नी मुकुंदनने देखील या चित्रपटाचे पहिले पोस्टर आपल्या इन्स्टाग्राम अकाऊंटवर शेअर केले. पोस्टरमध्ये मोदींच्या भूमिकेतील त्याची झलक पाहायला मिळाली आहे. त्याचसोबत त्याने मोदींना वाढदिवसाच्या शुभेच्छा देत भावनिक संदेश लिहिला आहे - "माझा पुढील चित्रपट 'मां वंदे'मध्ये देशाचे पंतप्रधान नरेंद्र दामोदरदास मोदी यांची भूमिका साकारत असल्याची घोषणा करताना मला अभिमान वाटतो."

उन्नी मुकुंदनने आपल्या आठवणींना उजाळा देत म्हटलं की, "माझं बालपण अहमदाबादमध्ये गेलं आणि मी मोदीजींना प्रथम मुख्यमंत्री म्हणून पाहिलं. एप्रिल २०२३ मध्ये मला त्यांची वैयक्तिक भेट घेण्याची संधी मिळाली, तो क्षण माझ्यासाठी अविस्मरणीय असून ही आठवण माझ्या आयुष्यात कायमची कोरळी गेली आहे. त्यांच्या भूमिकेत पडद्यावर उतरणं माझ्यासाठी प्रेरणादायी आहे."

या चित्रपटात मोदींचा बालपणापासून ते देशाचे पंतप्रधान होण्यापर्यंतचा संघर्षमय प्रवास दाखवला जाणार आहे. या चित्रपटाच्या दिग्दर्शनाची जबाबदारी क्रांती कुमार सीएच यांच्याकडे असून, हा चित्रपट इंग्रजीसह विविध भारतीय भाषांमध्ये प्रदर्शित होणार आहे.