वाढतं तापमान, धूळ, प्रदूषण आणि अनियमित दिनचर्या याचा परिणाम सर्वात आधी त्वचेवर दिसू लागतो. चेहरा निस्तेज दिसणे, त्वचा कोरडी पडणे किंवा कमी वयातच सुरकुत्या जाणवू लागणे ही समस्या अनेकांना भेडसावत असते. अशावेळी महागडी स्किनकेअर प्रॉडक्ट्स वापरण्यापेक्षा काही घरगुती उपायही फायदेशीर ठरू शकतात.

त्वचेचा नैसर्गिक ओलावा टिकवण्यासाठी आणि चेहऱ्याला मऊ, फ्रेश लुक देण्यासाठी ‘राइस जेल’ हा एक सोपा आणि कमी खर्चातील पर्याय ठरू शकतो. तांदळातील पोषक घटक, अॅलोव्हेरा आणि ग्रीन टी यांसारख्या घटकांमुळे त्वचेला पोषण मिळण्यास मदत होते.

राइस जेल बनवण्यासाठी लागणारे साहित्य

• अर्धा कप पांढरे तांदूळ

• १ मोठा चमचा अॅलोव्हेरा जेल

• २ मोठे चमचे ग्रीन टी

• १ छोटा चमचा मध

• १ व्हिटॅमिन E कॅप्सूलचे तेल

• अर्धा चमचा ग्लिसरीन

• १ मोठा चमचा फर्मेंटेड राइस वॉटर

• १ मोठा चमचा काकडीचा रस

राइस जेल कसं तयार कराल?

१. तांदूळ शिजवा
तांदूळ स्वच्छ धुऊन दोन कप पाण्यात उकळा. पाण्याचा रंग हलका दुधासारखा होईपर्यंत शिजू द्या.

२. पेस्ट तयार करा
शिजलेले तांदूळ आणि पाणी थंड झाल्यावर मिक्सरमध्ये ब्लेंड करा. नंतर हे मिश्रण गाळून घ्या.

३. जेल तयार करा
तयार पेस्ट काही वेळ फ्रिजमध्ये ठेवा. थोडी घट्ट झाल्यावर त्यात अॅलोव्हेरा, ग्रीन टी, मध, ग्लिसरीन, व्हिटॅमिन E तेल आणि काकडीचा रस मिसळा.

राइस जेल वापरण्याची योग्य पद्धत

• चेहरा स्वच्छ धुऊन कोरडा करा

• हलक्या हाताने जेल चेहऱ्यावर लावा

• टॅपिंग मोशनमध्ये त्वचेत मुरू द्या

• रात्री झोपण्यापूर्वी वापरल्यास अधिक फायदा होऊ शकतो

• ड्राय स्किन असल्यास दिवसातून दोनदा वापरू शकता

त्वचेसाठी राइस जेलचे फायदे

• त्वचेचा ओलावा टिकवण्यास मदत

• निस्तेजपणा कमी होऊ शकतो

• त्वचा मऊ आणि स्मूद दिसू शकते

• सुरकुत्या कमी दिसण्यास मदत

• घरच्या घरी कमी खर्चात तयार होणारा पर्याय

नैसर्गिक स्किनकेअरची सोपी सवय

त्वचेसाठी नेहमीच महागडी प्रॉडक्ट्स वापरण्याची गरज नसते. योग्य पद्धतीने घरगुती उपाय केल्यास त्वचा निरोगी आणि फ्रेश ठेवणं शक्य होतं. नियमित वापरासोबत त्वचेला नैसर्गिक चमक मिळण्यास मदत होऊ शकते.

(Disclaimer : या लेखातील माहिती ही सामान्य माहिती व घरगुती उपायांवर आधारित आहे. ‘नवशक्ति’ या उपायांच्या परिणामकारकतेची हमी देत नाही. कोणताही उपाय करण्यापूर्वी आपल्या त्वचेच्या प्रकारानुसार तज्ज्ञांचा सल्ला घ्यावा.)