हिवाळा म्हटलं की गरम कपडे, गरम चहा आणि थंडीचा आनंद. पण, याच हंगामात पुरुषांची त्वचा सर्वाधिक त्रास सहन करते. थंडीमुळे हवेतील आर्द्रता कमी होते, परिणामी त्वचा कोरडी, राठ आणि निस्तेज दिसते. विशेषत: पुरुषांची त्वचा नैसर्गिकरीत्या थोडी जाड आणि तेलकट असते, पण हिवाळ्यात ही नैसर्गिक ओलावा टिकवणारी कवच कमजोर होते. त्यामुळे योग्य स्किनकेअर रूटीन ठेवणं गरजेचं आहे.

१. मॉइस्चरायझर - हिवाळ्यातील सर्वोत्तम मित्र

दररोज चेहरा धुतल्यानंतर आणि आंघोळीच्या लगेच नंतर मॉइस्चरायझर लावणं अत्यावश्यक आहे. हिवाळ्यात oil-based किंवा cream-based मॉइस्चरायझर वापरल्यास त्वचेत ओलावा टिकतो. अनेकदा पुरुष मॉइस्चरायझर वापरणं टाळतात, पण याच सवयीमुळे त्वचा फुटणे, खाज येणे आणि रेषा पडणे सुरू होतं.

२. योग्य फेसवॉश निवडा

हिवाळ्यात हार्श केमिकल असलेले फेसवॉश वापरल्यास त्वचेतील नैसर्गिक तेल नष्ट होतात. त्यामुळे माइल्ड, हायड्रेटिंग फेसवॉश निवडणं उत्तम. ॲलोवेरा, ग्लिसरीन किंवा हायल्युरॉनिक ॲसिड असलेले फेसवॉश त्वचेला तजेला देतात.

३. सनस्क्रीनचा वापर विसरू नका

थंडीचा सूर्य जरी सौम्य वाटत असला तरी त्याच्या किरणांमुळे त्वचेवर टॅनिंग आणि अर्ली एजिंग होऊ शकते. त्यामुळे दररोज बाहेर पडताना SPF ३० किंवा त्याहून जास्त असलेला सनस्क्रीन वापरणं आवश्यक आहे.

४. ओठांची काळजी

थंड हवेने ओठ कोरडे पडणे किंवा फुटणे ही सामान्य समस्या आहे. दिवसातून दोन ते तीन वेळा शिया बटर, कोको बटर किंवा नारळ तेल असलेला लिप बाम वापरा.

५. अंघोळीचे पाणी आणि वेळ

अति गरम पाण्याने अंघोळ केल्यास त्वचेतलं नैसर्गिक तेल निघून जातं. त्यामुळे कोमट पाण्याने अंघोळ करा आणि जास्त वेळ पाण्यात राहणं टाळा. अंघोळीनंतर लगेच मॉइस्चरायझर लावल्यास परिणाम अधिक चांगला मिळतो.

६. रात्रीचं स्किनकेअर रूटीन

झोपण्यापूर्वी चेहऱ्यावर हलकं मॉइस्चरायझर आणि हात-पायांवर क्रीम लावल्यास सकाळी त्वचा मऊ आणि तजेलदार वाटते. इच्छित असल्यास व्हिटॅमिन E ऑइल थोड्या प्रमाणात वापरू शकता.

७. पुरेसं पाणी आणि हेल्दी आहार

थंडीमध्ये तहान कमी लागते, पण शरीरातील ओलावा टिकवण्यासाठी दिवसातून किमान २ ते २.५ लिटर पाणी पिणं आवश्यक आहे. तसंच आहारात व्हिटॅमिन E, C आणि ओमेगा-३ फॅटी ॲसिडस् असलेले पदार्थ बदाम, अक्रोड, संत्रं, टोमॅटो, गाजर यांचा समावेश करा.

हिवाळ्यातही त्वचा चमकदार ठेवणे शक्य!

पुरुषांसाठी स्किनकेअर म्हणजे फक्त साबण आणि पाणी एवढंच नाही. योग्य मॉइस्चरायझर, नियमित क्लिनिंग, आणि थोडी काळजी घेतल्यास त्वचा केवळ निरोगीच नव्हे, तर आकर्षकही दिसते. हिवाळ्यात थोडासा वेळ स्वतःसाठी काढा कारण निरोगी त्वचा ही फक्त सौंदर्य नव्हे, तर आरोग्याचं प्रतीक आहे.