पोलादपूर : तालुक्यातील पोलादपूर महाबळेश्वर वाई सुरूर राज्यमार्गावरील आंबेनळी घाटामध्ये गुरूवारपासून पावसाने जोर धरल्यानंतर शुक्रवारी सकाळी पुन्हा दरडी कोसळायला सुरूवात झाली असून, यावेळी घाटामाथ्यावरील झाडेदेखील दरडीसोबत रस्त्यावर कोसळू लागली असल्याचे दिसून आले आहे.

पोलादपूर तहसिल कार्यालयातील आपत्ती निवारण कक्षाने गुरूवारी दिवसभरामध्ये ४१ मि.मी. पाऊस पडल्याची तसेच आतापर्यंत ३४२७ मीमी पर्जन्यमान झाल्याची माहिती दिली. यावेळी आंबेनळी घाटातील दरडी हटविण्याचे काम तातडीने पूर्ण झाले असून, घाटमाथ्यावरून कोसळलेल्या झाडांनाही जेसीबीद्वारे रस्त्यावरून हटविण्यात आले असून, रस्ता मोकळा करण्यात आला असल्याची माहिती तहसिलदार कपिल घोरपडे यांनी दिली. यापूर्वी अनेक दिवस दरडग्रस्त असल्याने बंद असलेल्या आंबेनळी घाटात १५ ऑगस्टच्या सुट्टीच्या तीन दिवसांच्या पार्श्वभूमीवर मुंबई पुणे व तेथून पुणे-बंगलोर मार्गावरील वाहतूक वाढल्याने आंबेनळी घाटातील वाहतूक सुरू करण्यात आली होती.