मुंबई : महाराष्ट्र शालेय शिक्षण विभागाने शैक्षणिक वर्ष २०२६-२७ साठी अद्याप प्रवेश न मिळालेल्या ११ वीच्या विद्यार्थ्यांसाठी केंद्रीय ऑनलाइन प्रवेश प्रक्रियेची एक विशेष फेरी जाहीर केली आहे.
२१ ऑगस्ट रोजी जारी केलेल्या सूचनेनुसार, ११ वीच्या केंद्रीय ऑनलाइन प्रवेश प्रक्रियेसाठी आतापर्यंत एकूण १३,४३,४१८ विद्यार्थ्यांनी नोंदणी केली आहे. ज्या विद्यार्थ्यांचे प्रवेश अद्याप निश्चित झालेले नाहीत, त्यांच्यासाठी या विशेष फेरीचे आयोजन केले. या फेरीत सहभागी होणाऱ्या विद्यार्थ्यांना १० कनिष्ठ महाविद्यालयांचे प्राधान्यक्रम भरावे लागतील. तसेच, प्रवेश अर्जाचा भाग १ आणि भाग २ दोन्ही पूर्ण करून लॉक करणे आवश्यक असेल. शिक्षण विभागाने विद्यार्थी आणि पालकांना वेळापत्रकाची नोंद घेऊन प्रत्येक टप्पा दिलेल्या मुदतीत पूर्ण करण्याचा सल्ला दिला आहे.
वेळापत्रकानुसार, २३ ऑगस्ट रोजी सकाळी ११ वाजल्यापासून रिक्त जागांची यादी प्रसिद्ध केली जाईल. या कालावधीत नवीन विद्यार्थ्यांची नोंदणी आणि अर्जाच्या भाग १ मध्ये दुरुस्ती करण्याची परवानगी दिली जाईल. विद्यार्थ्यांना २३ ऑगस्ट ते २४ ऑगस्ट दरम्यान भाग २ मधील प्राधान्यक्रम फॉर्म भरून लॉक करावा लागेल.
जागा वाटप प्रक्रिया २५ ऑगस्ट रोजी होणार आहे. यानंतर इन-हाऊस, व्यवस्थापन आणि अल्पसंख्यांक कोट्यासह विविध कोट्यांतर्गत जागा मिळालेल्या विद्यार्थ्यांची यादी पोर्टलवर प्रदर्शित केली जाईल. कनिष्ठ महाविद्यालये देखील त्यांची प्रवेश गुणवत्ता किंवा निवड यादी प्रसिद्ध करतील. विद्यार्थ्यांना प्रवेशाशी संबंधित माहिती एसएमएस द्वारे मिळेल.
ज्या विद्यार्थ्यांना जागा वाटप झाली आहे आणि ते त्या जागेसाठी सहमत आहेत, त्यांना कागदपत्रांची पडताळणी आणि विहित शुल्क भरण्यासाठी संबंधित कनिष्ठ महाविद्यालयात जावे लागेल. त्यानंतर महाविद्यालय त्यांच्या लॉगिनद्वारे प्रवेश निश्चित, रद्द किंवा नाकारेल.
३० ऑगस्टला रिक्त जागा दाखवणार
या वेळापत्रकात २९ ऑगस्ट रोजी डेटा प्रोसेसिंग आणि त्यानंतर ३० ऑगस्ट रोजी सकाळी ११ वाजता रिक्त जागा प्रदर्शित करण्याची व्यवस्था करण्यात आली आहे. शिक्षण विभागाने विद्यार्थी, पालक, शाळा आणि कनिष्ठ महाविद्यालयांना या प्रक्रियेतील आपापले टप्पे वेळेत पूर्ण करण्याचे आवाहन केले आहे.