छत्रपती संभाजीनगर : वैजापूर तालुक्यातील हडस पिंपळगाव शिवारात समृद्धी महामार्गालगत गेल कंपनीच्या गॅस पाइपलाईनला शनिवारी गळती लागल्याने महामार्गावरील वाहतूक काही काळ बंद करण्यात आली. खबरदारीचा उपाय म्हणून नागपूरच्या दिशेने जाणारी वाहतूक वळविण्यात आल्याने धुळे-सोलापूर महामार्गावर वाहनांचा भार वाढला.
माहिती मिळताच प्रशासन आणि संबंधित यंत्रणा घटनास्थळी दाखल झाल्या. संभाव्य धोका लक्षात घेऊन समृद्धी महामार्गावरील साखळी क्रमांक ४४७ ते ४७० दरम्यानची वाहतूक धुळे-सोलापूर महामार्गावरून वळविण्यात आली.
मुंबईकडून जाणारी वाहने हडस पिंपळगाव इंटरचेंजवरून उतरवून धुळे-सोलापूर महामार्गावरून माळीवाडा येथे पुन्हा समृद्धी महामार्गावर सोडण्यात येत होती. तर नागपूरकडून येणारी वाहने माळीवाडा इंटरचेंजवरून वळवून हडस पिंपळगाव येथून पुन्हा महामार्गावर आणण्यात आली.