बीड : बीड ग्रामीण पोलीस ठाण्यात एका वादातून फिर्यादीच्या डोक्याला बंदूक लावल्याप्रकरणी धनंजय देशमुख यांच्याविरुद्ध गुन्हा नोंदवण्यात आला आहे. हत्येचा प्रयत्न केल्याचा त्यांच्यावर आरोप आहे, अशी माहिती पोलिसांनी रविवारी दिली. मात्र, देशमुख यांनी हे आरोप फेटाळून लावले आहेत. मस्साजोग गावचे दिवंगत सरपंच संतोष देशमुख यांचे धनंजय हे बंधू आहेत. संतोष यांच्या खुनाचे प्रकरण गाजले होते. त्यातून धनंजय मुंडे यांना मंत्रिपदाचा राजीनामा द्यावा लागला होता.
बीड तालुक्यातील बेलवडी येथील रहिवासी समाधान खिंडकर (३०) याने दिलेल्या फिर्यादीनुसार, ही घटना शनिवारी रात्री एका हॉटेलमध्ये घडली. जेव्हा खिंडकर हा रवीराज साबळे नावाच्या रील-मेकरचा इन्स्टाग्रामवर थेट व्हिडिओ (लाईव्ह) बनवत होता, तेव्हा धनंजय देशमुख याच्या अंगरक्षकाने त्याचा फोन हिसकावून घेतला. फोन का घेतला, असे विचारल्यावर धनंजय देशमुख याने आपल्या अंगरक्षकाचे पिस्तूल काढून ते फिर्यादीच्या डोक्याला लावले आणि त्याच्या कामात ढवळाढवळ न करण्याची धमकी दिली, असे एफआयआरमध्ये म्हटले आहे.