जळगाव : अंगणवाड्यांमधील वातावरण अधिक आकर्षक, आनंददायी आणि बालमैत्रीपूर्ण करण्यासाठी जळगाव जिल्हा परिषदेने अभिनव पाऊल उचलले आहे. मुख्य कार्यकारी अधिकारी मीनल करनवाल यांच्या संकल्पनेतून जिल्ह्यातील सुमारे १००० अंगणवाड्यांना केळीच्या आकाराचे रंगीत बाक (Banana Shaped Benches) उपलब्ध करून देण्यात येत आहेत.

या देखण्या आणि आकर्षक बाकांमुळे अंगणवाडीत येणाऱ्या लहान मुलांना खेळता खेळता शिकण्याचा आनंद मिळणार आहे. केळीच्या आकाराचे रंगीत डेस्क मुलांचे लक्ष वेधून घेत असून त्यांच्यात शिकण्याची आवड निर्माण करण्यास मदत होणार आहे. तसेच बसण्याची सुरक्षित आणि सुटसुटीत व्यवस्था उपलब्ध होणार असल्याने वर्गातील वातावरण अधिक सुसज्ज होईल.

या उपक्रमामुळे अंगणवाड्यांमधील पारंपरिक आणि काहीसे निरस शैक्षणिक वातावरण बदलून ते अधिक आनंददायी होण्याची अपेक्षा व्यक्त केली जात आहे. जिल्हा परिषद प्रशासनाच्या पुढाकारातून १५व्या वित्त आयोगाच्या निधीतून हा उपक्रम राबविण्यात येत असून अंगणवाड्यांच्या भौतिक सुविधांमध्ये लक्षणीय सुधारणा होणार आहे.