जळगाव : जामनेर-बोदवड रस्त्यावरील मालदाभाडी फाट्याजवळ ट्रक आणि दुचाकीच्या भीषण अपघातात सहा जणांचा मृत्यू झाला. मृतांमध्ये एकाच कुटुंबातील पाच जणांचा समावेश असून, तीन महिन्यांच्या बाळाचाही मृत्यू झाला.
सर्व मृत मध्य प्रदेशातील बऱ्हाणपूर जिल्ह्यातील मालची तांडा येथील रहिवासी असून, ते शेतमजूर असल्याची माहिती आहे. गुरुवारी दुपारी साडेतीनच्या सुमारास मालदाभाडी फाट्याजवळील पेट्रोल पंपानजीक हा अपघात घडला.
पल्सर दुचाकी (क्र. एमपी ६८ झेडएफ ३३४०) बोदवडकडून येत असताना जामनेरकडून जाणाऱ्या ट्रकची (क्र. एचआर ५५ एके ५२३२) तिला धडक बसली.
या दुर्घटनेत दुचाकीवरील सहाही जणांचा मृत्यू झाला. मृतांमध्ये रामा सुरशिंग भिलाले (२६), शिमला रामा भिलाले (२२), पुज्या रामा भिलाले (५), भरती रामा भिलाले (३), श्रवण रामा भिलाले (तीन महिने) आणि चंपालाल रेवणशिंग भिलाले (२८) यांचा समावेश आहे.
अपघातस्थळाजवळील एचपी पेट्रोल पंपावरील सीसीटीव्ही फुटेज पोलिसांनी मिळवले आहे. ट्रक आणि चालकाला पोलीस ठाण्यात आणण्यात आले असून, गुन्हा दाखल करण्याची प्रक्रिया सुरू आहे. या दुर्घटनेमुळे परिसरात हळहळ व्यक्त होत आहे.