मुंबई : महाराष्ट्र राज्य कला शिक्षण मंडळांतर्गत घेण्यात आलेल्या शासकीय रेखाकला (एलिमेंटरी व इंटरमिजिएट ड्रॉइंग ग्रेड) परीक्षेचा निकाल आज जाहीर करण्यात आला आहे. एलिमेंटरी परीक्षेचा निकाल ९७.४० टक्के तर इंटरमिजिएट परीक्षेचा निकाल ९५.९० टक्के लागला आहे.

एलिमेंटरी व इंटरमिजिएट ड्रॉइंग ग्रेड परीक्षेचा निकाल https://msbae.ac.in या संकेतस्थळावरील GRADE EXAM या टॅबमध्ये व https://dge.msbae.in/https://dge.msbse.in/Result/Search/Form या लिंकवर पाहता येणार आहे. महाराष्ट्र राज्य कला शिक्षण मंडळांतर्गत घेण्यात आलेल्या शासकीय रेखाकला (एलिमेंटरी व इंटरमिजिएट ड्रॉईंग ग्रेड) परीक्षा शालेय स्तरावर सप्टेंबर २०२५ मध्ये घेण्यात आली होती. एलिमेंटरी व इंटरमिजिएट परीक्षांमध्ये २०२५ या वर्षी एकूण ७.१९,४४१ विद्यार्थ्यांनी नोंदणी केली होती. एलिमेंटरी परीक्षेसाठी ४ लाख ४ हजार ७७५ विद्यार्थ्यांनी नोंदणी खेळू होती. यापैकी ३ लाख ९० हजार १०१ विद्यार्थी परीक्षेला बसले होते, तर १४ हजार ६७४ विद्यार्थी अनुत्तीर्ण झाले होते. या परीक्षेत ३ लाख ७९ हजार ९५९ विद्यार्थी उत्तीर्ण झाले आहेत.

२ लाखांहून अधिक विद्यार्थी उत्तीर्ण

इंटरमिजिएट परीक्षेसाठी ३ लाख १४ हजार ६६६ विद्यार्थ्यांनी नोंदणी केली होती. यापैकी ३ लाख ७ हजार ८२४ विद्यार्थी परीक्षेला बसले होते, तर ६ हजार ८४२ विद्यार्थी परीक्षेला अनुपस्थित होते. परीक्षेला बसलेल्या विद्यार्थ्यांपैकी २ लाख ९५ हजार २२३ विद्यार्थी उत्तीर्ण झाले आहेत.