मुंबई : महाराष्ट्र राज्य २०२७ पर्यंत ‘कुष्ठरोगमुक्त’ करण्यासाठी राज्य सरकारच्या माध्यमातून विविध उपक्रम राबविण्यात येत आहेत. कुष्ठरुग्णांचा शोध घेत त्यांच्यावर वेळीच उपचार करण्यासाठी २०२३-२४ व २०२४-२५ मध्ये ‘कुसूम सर्वेक्षण मोहीम’ राबविण्यात आली होती. या मोहिमेत ३३ लाख ७४ हजार ९८२ लोकांची तपासणी केली असता ४१ हजार २६९ संशयित रुग्ण आढळले, तर तब्बल १,८७१ रुग्ण हे कुष्ठरोगी असल्याची धक्कादायक माहिती ‘कुसूम सर्वेक्षणा’तून पुढे आली आहे.
महाराष्ट्र कुष्ठरोग निर्मूलनासाठी राज्य सरकारच्या आरोग्य विभागामार्फत कुसूम सर्वेक्षण मोहीम राबविण्यात आली. कुष्ठरोगाचे ‘वेळीच निदान व वेळीच उपचार’ ही संशयित रुग्णांची शोधमोहीम राबविण्यात आली. या शोधमोहिमेत ८१ नवीन कुष्ठरुग्णांची नोंद झाल्याची माहिती राज्य सरकारच्या कुष्ठरोग निर्मूलन विभागातील अधिकाऱ्याने दिली.
मुंबई ‘कुष्ठरोगमुक्त’ करण्याचे उद्दिष्ट ठेवत राज्य सरकार व मुंबई महापालिकेने कुष्ठरुग्णांची शोध मोहीम हाती घेतली होती. या शोधमोहिमेत ३२ लाख ७४ हजार ९८२ व्यक्तींची तपासणी करण्यात आली. या तपासणीत ४१ हजार २६९ संशयित आढळले.
एकूण आकडेवारी
तपासणी - ३३ लाख ७४ हजार ९८२
संशयित रुग्ण - ४० हजार ७०५
निदान - १,८७१ रुग्ण आढळले
कुष्ठरोगाची लक्षणे :
कुष्ठरोगबाधित रुग्णांच्या त्वचेवर फिकट किंवा लालसर बधिर चट्टा अथवा चट्टे येणे, त्या ठिकाणी घाम न येणे, जाड बधीर तेलकट चकाकणारी त्वचा, कानाच्या पाळ्या जाड होणे, भुवयांचे केस विरळ होणे, डोळे पूर्ण बंद करता न येणे; तसेच तळहातावर वा तळपायावर मुंग्या येणे, बधिरपणा व जखमा असणे, हाताची व पायाची बोटे वाकडी असणे, हात व पायांमध्ये अशक्तपणा जाणवणे, हातातून वस्तू गळून पडणे, चालताना पायातून चप्पल गळून पडणे यांसारखी लक्षणे आढळून येतात.