निवडणूक तोंडावर असताना मतदानाच्या प्रक्रियेत मोठा बदल करण्यात आला आहे. ०२ डिसेंबरला होणारे मतदान आता पुढे ढकलले आहे. राज्यातील २४६ नगरपरिषदा आणि ४२ नगरपंचायतींची निवडणूक २ डिसेंबरला आणि मतमोजणी ३ डिसेंबरला होणार होती. अशातच, राज्य निवडणूक आयोगाने तब्बल १९ नगरपरिषदांच्या निवडणुका लांबणीवर टाकल्या आहेत.
बारामती, फलटण आणि महाबळेश्वर निवडणूक पुढे ढकलली
राज्य निवडणूक आयोगाने बारामती, महाबळेश्वर आणि फलटण नगरपरिषदांच्या निवडणूक प्रक्रियेत फेरबदल केले आहेत. जिल्हा न्यायालयात निवडणूक प्रक्रियेबाबत दाखल करण्यात आलेल्या याचिकांवर निर्णय देण्यासाठी न्यायालयाने ८ दिवसांची मुदत मागितली होती. यामुळे आयोगाला निवडणूक पुढे ढकलण्याचा निर्णय घ्यावा लागला.
अंबरनाथ नगरपरिषदेतील सहा प्रभागांची निवडणूक स्थगित
काही उमेदवारांनी निवडणूक निर्णयाधिकारीच्या निकालाविरोधात न्यायालयात धाव घेतली होती. या याचिकांवर सुनावणी करताना न्यायालयाने संबंधित प्रभागांतील निवडणुका स्थगित करण्याचे निर्देश दिले. त्यामुळे या सहा प्रभागांमध्ये मतदानाची नवी तारीख निश्चित करण्यात आली आहे. निवडणूक अंतिम टप्प्यात असताना हा बदल झाल्याने उमेदवारांना प्रचाराच्या नव्या रणनिती आखाव्या लागणार आहेत, तर प्रशासनालाही संपूर्ण निवडणूक कार्यक्रम पुन्हा आखण्याचे आव्हान आहे.
मतमोजणी कधी होणार?
निवडणूक निर्णय अधिकाऱ्यांच्या आदेशांविरोधात विविध उमेदवारांनी दाखल केलेल्या न्यायालयीन अपीलांमुळे अनेक नगरपरिषद आणि नगरपंचायतींच्या निवडणुका रखडल्या होत्या. सर्व बाजूंचा विचार करून राज्य निवडणूक आयोगाने निवडणुकीचा कार्यक्रम सुधारित केला असून मतदान २० डिसेंबर आणि मतमोजणी २१ डिसेंबरला असणार आहे.
निवडणूक पुढे ढकललेल्या नगरपरिषदा कोणत्या?
अंबरनाथ, बारामती, फलटण, महाबळेश्वर, पंढरपूर, दिग्रस–पांढरकवडा, वणी, कोपरगाव, देवळाली, नेवासा, पाथर्डी, घुग्गूस, बाळापूर, धर्माबाद, मुखेड, तळेगाव, अंजनगाव सुर्जी, पूर्णा, जिंतूर.