जालना : मराठा आरक्षणाच्या प्रलंबित मागण्यांसाठी मनोज जरांगे-पाटील यांनी २९ ऑगस्टपासून अंतरवाली सराटी येथे बेमुदत उपोषण सुरू केले आहे. मंगळवारी (दि. १) उपोषणाचा चौथा दिवस असून, वैद्यकीय पथकाने आरोग्य तपासणीची वारंवार विनंती करूनही जरांगे यांनी तपासणीस नकार दिला. दरम्यान, त्यांच्या प्रकृतीबाबत चिंता व्यक्त होत असून, आज सरकारी शिष्टमंडळ त्यांची भेट घेऊन मागण्यांवर चर्चा करणार आहे.
तपासणीसाठी डॉक्टरांची विनंती
जरांगे यांच्या प्रकृतीची तपासणी करण्यासाठी वैद्यकीय पथक आंदोलनस्थळी पोहोचले. डॉक्टरांनी त्यांना उठवून तपासणी करण्याची परवानगी मागितली. मात्र, हाताने इशारा करत त्यांनी तपासणी करून घेण्यास नकार दिला.
वैद्यकीय अधिकारी डॉ. विजय वाकोडे यांनी सांगितले की, जरांगे यांनी नियमित आरोग्य तपासणी करून घ्यावी, यासाठी पथकाकडून प्रयत्न सुरू राहतील. "आम्ही त्यांना वारंवार विनंती करत आहोत. मात्र त्यांनी तपासणीस नकार दिला आहे. वैद्यकीय पथक येथेच आहे. दर दोन तासांनी आम्ही त्यांना तपासणीसाठी विनंती करू", असे वाकोडे यांनी सांगितले.
रक्तदाब आणि साखरेची पातळी तपासली
डॉक्टरांच्या माहितीनुसार, आदल्या दिवशी करण्यात आलेल्या तपासणीत जरांगे यांचा रक्तदाब सुमारे १३०, तर रक्तातील साखरेची पातळी सुमारे ७० होती. मात्र, त्यानंतर त्यांनी वैद्यकीय तपासणी नाकारल्याने त्यांच्या प्रकृतीबाबत चिंता व्यक्त केली जात आहे.
कुणबी प्रमाणपत्रांची प्रमुख मागणी
पात्र मराठ्यांना कुणबी जात प्रमाणपत्रे द्यावीत आणि मराठा आरक्षणाच्या प्रलंबित मागण्यांवर सरकारने तातडीने निर्णय घ्यावा, अशी जरांगे-पाटील यांची मागणी आहे. याच मागण्यांसाठी त्यांनी २९ ऑगस्टपासून अंतरवाली सराटी येथे बेमुदत उपोषण सुरू केले आहे.
मंत्रिमंडळाच्या बैठकीत आंदोलनावर चर्चा
जरांगे यांच्या आंदोलनामुळे राज्य सरकारवरील दबाव वाढला आहे. मंगळवारी होणाऱ्या राज्य मंत्रिमंडळाच्या बैठकीत त्यांच्या आंदोलनासह मराठा आरक्षणाच्या मागण्यांवर चर्चा होण्याची शक्यता आहे.
सरकारचे शिष्टमंडळ भेटणार
मंत्रिमंडळाच्या बैठकीनंतर सरकारी शिष्टमंडळ जरांगे-पाटील यांची भेट घेण्याची शक्यता आहे. वृत्तानुसार, भाजप आमदार प्रसाद लाड सकाळी अंतरवाली सराटी येथे जरांगे यांची भेट घेतली. मंत्री शंभूराज देसाई, उदय सामंत आणि राधाकृष्ण विखे-पाटील हेही त्यांची भेट घेण्याची शक्यता आहे. शिष्टमंडळाकडून सरकारची भूमिका जरांगे यांच्यासमोर मांडली जाणार असून, त्यांच्या मागण्यांवर चर्चा होण्याची शक्यता आहे.