पेण : पेण येथील के. ई. एस. स्कूलमध्ये नगरपालिका निवडणुकीनंतर मतपेट्या स्ट्रॉग रूममध्ये ठेवण्यात आल्या होत्या. या स्ट्रॉग रूममध्ये पोलीस बंदोबस्त असून निवडणूक अधिकारी आणि कर्मचारी देखरेखीसाठी तैनात होते.
शनिवारी पहाटेच्या सुमारास स्ट्रॉग रूममध्ये ठेवलेल्या मतपेट्यांच्या खाली असलेल्या लाकडी कपाटाचा दरवाजा उघडल्याने अचानक गोंधळ उडाला. याची माहिती उमेदवारांना मिळताच त्यांनी सीसीटीव्ही फुटेज तपासण्याची मागणी केली. उमेदवारांच्या मागणी नुसार सीसीटीव्ही फुटेज पाहिल्यानंतर धक्कादायक सत्य समोर आले. या फुटेजमध्ये उंदराने दरवाजा उघडल्याचे स्पष्टपणे दिसून आले.
तहसीलदार तानाजी शेजाळ आणि इतर अधिकारी स्ट्रॉग रूमवर पोहोचून घटनास्थळी पाहणी केली. त्यांनी सांगितले की, उंदरामुळेच लाकडी कपाटाचा दरवाजा उघडला गेला, तसेच हेच सीसीटीव्ही फुटेजमध्येही निदर्शनास आले.