मुंबई : शिवसेना (ठाकरे) पक्षातून शिंदे गटात प्रवेश केल्यानंतर अवघ्या एका दिवसात सचिन अहिर यांना मोठी राजकीय जबाबदारी मिळाली. महायुतीच्या विनंतीनंतर ठाकरे गटाने उपसभापतीपदाच्या निवडणुकीतून माघार घेतल्याने अहिर यांची बुधवारी (दि. १) महाराष्ट्र विधान परिषदेच्या उपसभापतीपदी बिनविरोध निवड झाली.
विरोधकांची माघार
महाविकास आघाडीने सुरुवातीला विधान परिषदेच्या उपसभापतीपदासाठी जगन्नाथ अभ्यंकर यांना उमेदवारी दिली होती. मात्र, उपसभापतींची निवड एकमताने करण्याची परंपरा कायम ठेवण्याचे आवाहन सत्ताधारी महायुती आणि संसदीय कार्यमंत्री चंद्रकांत पाटील यांनी विरोधकांना केले. त्यानंतर ठाकरे गटाने उमेदवारी मागे घेतली आणि सचिन अहिर यांचा बिनविरोध निवडीचा मार्ग मोकळा झाला.
राम शिंदे यांच्याकडून औपचारिक घोषणा
महाराष्ट्र विधान परिषदेचे सभापती राम शिंदे यांनी सभागृहात सचिन अहिर यांच्या बिनविरोध निवडीची औपचारिक घोषणा केली. अन्य कोणत्याही उमेदवाराने अर्ज कायम न ठेवल्याने सुरू असलेल्या पावसाळी अधिवेशनात अहिर यांना बिनविरोध निवडून आल्याचे घोषित करण्यात आले.
पक्षप्रवेशानंतर एका दिवसात मोठी जबाबदारी
आदित्य ठाकरे यांचे निकटवर्तीय मानले जाणारे सचिन अहिर यांनी मंगळवारी उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश केला. पक्षप्रवेशानंतर लगेचच महायुतीने त्यांना विधान परिषदेच्या उपसभापतीपदासाठी उमेदवार घोषित केले होते. त्याचदिवशी त्यांनी उमेदवारी अर्ज दाखल केला आणि आज ते विधान परिषदेचे उपसभापती झाले.
ठाकरे गटाला धक्का
सचिन अहिर यांचा पक्षप्रवेश हा शिवसेना ठाकरे गटासाठी एक मोठा राजकीय धक्का मानला जात आहे. याआधीच ठाकरे गटातील सहा लोकसभा खासदार शिंदे सेनेत दाखल झाले होते. त्यानंतर आता मुंबईतील प्रभावी नेते आणि विधान परिषद सदस्य असलेल्या अहिर यांनीही शिंदे गटाची वाट धरल्याने राज्यातील राजकीय समीकरणांवर त्याचा परिणाम होणार असल्याची चर्चा आहे.
मुंबईच्या राजकारणातील प्रभावी चेहरा
सचिन अहिर यांनी १९९० च्या दशकात गिरणी कामगार चळवळीतून राजकारणात प्रवेश केला. त्यांनी काँग्रेस, त्यानंतर राष्ट्रवादी काँग्रेस आणि पुढे एकसंघ शिवसेनेत काम केले. वरळीचे माजी आमदार असलेल्या अहिर यांना मुंबईच्या राजकारणातील प्रभावी चेहरा मानले जाते. २०२२ मध्ये त्यांची विधान परिषदेत निवड झाली होती. आता उपसभापतीपदी निवड झाल्याने त्यांच्या राजकीय कारकिर्दीत आणखी एक महत्त्वाचा टप्पा गाठला आहे.