मुंबई महानगरपालिकेच्या (बीएमसी) आयुक्तपदी वरिष्ठ आयएएस अधिकारी अश्विनी भिडे यांची नियुक्ती करण्यात आली असून त्या आज पदभार स्वीकारणार आहेत. या नियुक्तीसह मुंबईच्या इतिहासात पहिल्यांदाच महिला आयुक्त मिळणार आहेत. विद्यमान आयुक्त भूषण गगराणी आज निवृत्त होत असून त्यांच्या जागी भिडे यांची निवड करण्यात आली आहे. मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या बैठकीत हा निर्णय घेण्यात आला.
आज पदभार स्वीकारणार
भूषण गगराणी यांनी सांगितले की, “मी आज कार्यालयात आहे आणि अश्विनी भिडे दुपारी पदभार स्वीकारतील. अधिकृत आदेश लवकरच जारी होईल.” गगराणी यांनी गेली दोन वर्षे बीएमसी आयुक्त म्हणून काम पाहिले.
गगराणी यांना सेवा विस्तार मिळण्याची शक्यता व्यक्त केली जात होती आणि त्यांची बदली मुख्यमंत्री कार्यालयात (CMO) होऊ शकते, अशी चर्चा होती. मात्र, अद्याप यासंदर्भात कोणताही अधिकृत आदेश जारी झालेला नाही.
अश्विनी भिडे कोण आहेत?
१९९५ बॅचच्या आयएएस अधिकारी असलेल्या अश्विनी भिडे सध्या मुख्यमंत्री कार्यालयात अतिरिक्त मुख्य सचिव म्हणून कार्यरत आहेत. त्याचबरोबर त्या मुंबई मेट्रो रेल कॉर्पोरेशनच्या व्यवस्थापकीय संचालक पदावरही होत्या.
मुंबई मेट्रो ३ प्रकल्पासारख्या अत्यंत गुंतागुंतीच्या भूमिगत मेट्रो प्रकल्पांचे यशस्वी नेतृत्व केल्यामुळे त्यांना ‘मेट्रो वुमन’ म्हणून ओळख मिळाली आहे. कठोर, परिणामकेंद्री आणि ठाम प्रशासनशैलीसाठी त्या ओळखल्या जातात.
इतर दावेदारांवर मात
बीएमसी आयुक्तपदासाठी संजय मुखर्जी आणि असीम गुप्ता यांची नावे चर्चेत होती. मात्र, मोठ्या प्रकल्पांचा अनुभव आणि प्रशासनातील पकड लक्षात घेता भिडे यांना अंतिम पसंती देण्यात आली.
नागपूर महानगरपालिका आयुक्त म्हणून काम केलेल्या भिडे यांना बीएमसीमध्ये अतिरिक्त आयुक्त म्हणून काम करण्याचा अनुभव असल्याने महानगरपालिकेच्या कामकाजाची त्यांना सखोल माहिती आहे.
मोठी जबाबदारी, मोठ्या अपेक्षा
मुंबईसारख्या महानगरात पायाभूत सुविधा, स्वच्छता, वाहतूक व्यवस्थापन आणि शहरी प्रशासन या महत्त्वाच्या क्षेत्रांची जबाबदारी आता भिडे यांच्या खांद्यावर असणार आहे. त्यांच्या नियुक्तीकडे शहरातील महत्त्वाच्या प्रकल्पांना गती मिळेल आणि प्रशासनात शिस्त येईल, या अपेक्षेने पाहिले जात आहे.