मेघा कुचिक/मुंबई
मुंबईतील वांद्रे पश्चिम भागात सुरक्षेचे नियम धाब्यावर बसवून विनापरवानगी तब्बल २०० ते २५० ड्रोन्स उडवल्याचा धक्कादायक प्रकार समोर आला आहे. या प्रकरणी वांद्रे पोलिसांनी दोघा जणांविरोधात गुन्हा दाखल केला आहे. एका खासगी कंपनीच्या जाहिरात मोहिमेसाठी या ड्रोन्सचा वापर केला जात असल्याचा तपास समोर आला आहे.
वांद्रे पश्चिम येथील ‘विंग स्पोर्ट्स क्लब’च्या मैदानावर २८ मे रोजी रात्री २५० च्या आसपास ड्रोन्स उडवून चित्रीकरण सुरू असल्याची माहिती पोलिसांना मिळाली. पोलिसांचे पथक घटनास्थळी दाखल झाले. त्यांनी ड्रोन्स खाली उतरवण्याचे आदेश दिले. प्राथमिक चौकशीत हे ड्रोन्स बोल्डसन मार्केटिंग प्रायव्हेट लिमिटेड या कंपनीकडून जाहिरात आणि प्रसिद्धीसाठी वापरले जात असल्याचे उघड झाले. यातील प्रत्येक ड्रोनची किंमत सुमारे ८० हजार आहे. या संपूर्ण प्रक्रियेच्या चित्रीकरण व नियंत्रणासाठी ड्रोन कॅमेरे आणि लॅपटॉपचा वापर केला जात होता. दरम्यान, सुनील गुप्ता आणि कंपनीचे व्यवस्थापक गोपाल सिंह (४५) यांच्याविरुद्ध गुन्हा दाखल केला आहे.