मुंबई : टिटवाळा-सीएसएमटी एसी लोकलमध्ये वातानुकूलन (AC) यंत्रणा बंद पडल्याने काही प्रवाशांची प्रकृती बिघडल्याच्या घटनेची गंभीर दखल घेत मध्य रेल्वेने एसी लोकलच्या संचालनासाठी नवा प्रोटोकॉल जाहीर केला आहे. प्रवाशांच्या सुरक्षिततेला प्राधान्य देत अशा परिस्थितीत तातडीने योग्य कारवाई करण्याच्या सूचना रेल्वे प्रशासनाने संबंधित कर्मचाऱ्यांना दिल्या आहेत.
मोटरमनना नव्या सूचनांची माहिती
मध्य रेल्वेने मंगळवारी (दि.१४) मोटरमनना नव्या कार्यपद्धतीबाबत सूचना दिल्या. अधिकाऱ्यांनी सांगितले की, एसी यंत्रणेत बिघाड झाल्यास प्रवाशांच्या सुरक्षिततेला प्राधान्य देत गाडी पुढील स्थानकावर रिकामी करण्यात येईल. त्यानंतर संबंधित रेकची तपासणी करून दुरुस्ती झाल्यानंतरच ती पुन्हा सेवेत दाखल केली जाईल.
एसी बंद राहिल्याने प्रवासी त्रस्त
सोमवारी सकाळी ८.३३ वाजताच्या टिटवाळा-सीएसएमटी एसी लोकलमध्ये दिवा स्थानकानंतर वातानुकूलन यंत्रणा अचानक बंद पडली. सुमारे १५ मिनिटे एसी बंद असल्याने डब्यात उकाडा वाढला. त्यामुळे काही प्रवाशांना गुदमरल्यासारखे वाटले, तर तीन प्रवाशांची प्रकृती बिघडली.
मुलुंडनंतर दरवाजे उघडे ठेवून धावली लोकल
प्रवाशांच्या तक्रारीनंतर मुलुंड स्थानकावर गाडी थांबवण्यात आली. त्यानंतर मुलुंड ते कुर्ला या दरम्यान डब्यात हवा खेळती राहावी म्हणून लोकलचे दरवाजे उघडे ठेवून गाडी चालवण्यात आली. पुढे कुर्ला स्थानकावर संबंधित रेक सेवेतून बाहेर काढून तिची सविस्तर तपासणी करण्यात आली.
बिघाडाचे कारण अस्पष्ट
मध्य रेल्वेच्या अधिकाऱ्यांनी सांगितले की, रेक कारशेडमधून बाहेर पडताना कोणताही तांत्रिक दोष आढळला नव्हता. हा बिघाड प्रवासादरम्यान निर्माण झाला. तसेच, गाडी सुरू असताना ट्रॅक्शन पर्यवेक्षकाला संबंधित डब्यात प्रवेश करता आला नसल्याने तत्काळ तपासणी करणे शक्य झाले नाही. बिघाडाचे नेमके कारण शोधण्याचे काम सुरू असल्याचे रेल्वे प्रशासनाने स्पष्ट केले.