मुंबई : मध्य रेल्वेच्या मुंबई विभागात रविवारी (१६ ऑगस्ट) रेल्वे रुळांची दुरुस्ती आणि तांत्रिक कामांसाठी मेगाब्लॉक घेण्यात येणार आहे. ठाणे-कल्याण जलद मार्गासह हार्बर मार्गावरील पनवेल-वाशी दरम्यानच्या अप-डाऊन मार्गावर हा ब्लॉक असेल. त्यामुळे रविवारी प्रवास करणाऱ्या मुंबईकरांना काही लोकलच्या वेळापत्रकात बदल आणि सेवा रद्द होण्याचा सामना करावा लागणार आहे. पश्चिम रेल्वेवर मात्र रविवारी कोणताही ब्लॉक नाही.

ठाणे-कल्याण मार्गावर साडेचार तासांचा ब्लॉक

ठाणे-कल्याण अप आणि डाऊन जलद मार्गावर सकाळी १०.४० ते दुपारी ३.१० वाजेपर्यंत मेगाब्लॉक असेल. या काळात सीएसएमटीहून सकाळी ९.३४ ते दुपारी २.१७ दरम्यान सुटणाऱ्या डाऊन जलद आणि अर्ध-जलद लोकल ठाणे-कल्याणदरम्यान डाऊन धीम्या मार्गावर वळवण्यात येतील. या लोकलना कळवा, मुंब्रा, दिवा, कोपर, डोंबिवली आणि ठाकुर्ली येथे अतिरिक्त थांबे देण्यात येतील.

कल्याणहून सुटणाऱ्या अप जलद आणि अर्ध-जलद लोकलही ठाणेपर्यंत अप धीम्या मार्गावर वळवण्यात येतील. त्यांना ठाकुर्ली, डोंबिवली, कोपर, दिवा, मुंब्रा आणि कळवा येथे थांबे असतील.

पनवेल-वाशी हार्बर मार्गावर सेवा रद्द

पनवेल-वाशी अप आणि डाऊन हार्बर मार्गावर सकाळी ११.०५ ते दुपारी ४.०५ वाजेपर्यंत ब्लॉक असेल. या कालावधीत पनवेल-सीएसएमटी आणि सीएसएमटी-पनवेल/बेलापूर दिशेच्या हार्बर लोकल रद्द राहतील. ठाणे-पनवेल ट्रान्स-हार्बर सेवांवरही परिणाम होईल. दरम्यान, सीएसएमटी-वाशी विशेष लोकल सुरू राहतील.

(इंग्रजी बातमी वाचण्यासाठी येथे क्लिक करा.)