मुंबई : इंडियन इन्स्टिट्यूट ऑफ मॅनेजमेंट मुंबईने (आयआयएम मुंबई) नवी मुंबईत आर्थिक व वित्तीय शिक्षण केंद्र स्थापन करण्याचा निर्णय घेतला आहे. त्यानुसार याबाबतचा प्रस्ताव राज्य सरकारकडे सादर केला आहे. या केंद्राच्या माध्यमातून वित्तीय क्षेत्रातील प्रशिक्षण, संशोधन आणि नवोन्मेषी अभ्यासक्रम उपलब्ध करून देण्याचा संस्थेचा उद्देश आहे. तसेच, उद्योगांना आवश्यक असलेले प्रशिक्षित व्यावसायिक घडवून देशाच्या अर्थव्यवस्थेला हातभार लावण्याची तयारी संस्थेने दाखवली आहे.

आयआयएम मुंबईचा दुसरा दीक्षांत समारंभ शनिवारी पार पडला. या समारंभात ही घोषणा करण्यात आली. या वेळी व्हिजनरी लीडर्स फॉर मॅन्युफॅक्चरिंग कार्यक्रमाच्या सातव्या बॅचमधील ९३२ पदव्युत्तर विद्यार्थी, ३१ पीएचडी विद्यार्थी आणि २५ पदवीधरांना पदव्या प्रदान करण्यात आल्या. या दीक्षांत समारंभाला पंतप्रधानांचे प्रधान सचिव पी. के. मिश्रा प्रमुख पाहुणे म्हणून उपस्थित होते. जागतिक अर्थव्यवस्थेतील आव्हानांवर त्यांनी यावेळी प्रकाश टाकला. व्यापार युद्धे, भू-राजकीय तणाव आणि तांत्रिक अडथळे यांचा उल्लेख करत त्यांनी बदलत्या परिस्थितीवर भाष्य केले.

आयआयएम मुंबईने नवी मुंबईत वित्तीय शिक्षणाचे केंद्र सुरू करण्याचा निर्णय घेतला आहे. यासाठी भारतीय रिझर्व्ह बँक, नॅशनल स्टॉक एक्सचेंज तसेच इतर वित्तीय संस्थांशी समन्वय साधण्यात येत आहे.

आयआयएम संबलपूरच्या माध्यमातून ओडिशातील अंगुल येथे व्यवस्थापन शिक्षण केंद्र उभारण्याचे काम करत आहे. हे केंद्र कोळसा उद्योगांसाठी खाणकाम व लॉजिस्टिक्समध्ये क्षमता निर्मिती आणि व्यवस्थापन विकास कार्यक्रम राबवणार आहे. तसेच भविष्यात, कायदेशीर व्यवस्थापन आणि रुग्णालय व्यवस्थापन या क्षेत्रांत अभ्यासक्रम सुरू करण्याचाही विचार आहे.

फिनटेक, ट्रस्ट मॅनेजमेंट, सायबर सुरक्षेचे अभ्यासक्रम

केंद्रात अल्पकालीन व दीर्घकालीन प्रशिक्षण कार्यक्रम सुरू करण्याची योजना आहे. फिनटेक, ट्रस्ट मॅनेजमेंट, सायबर सुरक्षा यासारख्या नव्या काळातील अभ्यासक्रम विद्यार्थ्यांना उपलब्ध करून देण्याचा विचार असल्याचे आयआयएम मुंबईचे संचालक मनोज तिवारी यांनी सांगितले.