मुंबई : मुंबईतील बेकायदा बांधकामांना आळा घालण्यासाठी बेकायदा बांधकामाचे वर्गीकरण करा, असे निर्देश उपमुख्यमंत्री एकनाथ शिंदे यांनी मुंबई महापालिका आयुक्तांना दिले. तसेच बेकायदा बांधकामांना पाठीशी घालणाऱ्या अधिकाऱ्यांवर कारवाई करण्यात येईल, असा इशाराही शिंदे यांनी दिला. विधानसभेत सदस्य पराग अळवणी यांनी विलेपार्ले येथे पालिकेच्या जागेवर बेकायदा शेड असल्याचा मुद्दा उपस्थित केला होता. मुंबईतील सर्वंच बेकायदा बांधकामाचे वर्गीकरण करण्याचे निर्देश पालिका आयुक्तांना दिल्याचे शिंदे यांनी प्रश्नोत्तराच्या तासात सांगितले.
यावेळी सदस्य योगेश सागर, जितेंद्र आव्हाड, दिलीप वळसे-पाटील, वरुण सरदेसाई, मुरजी पटेल, अजय चौधरी, बाळा नर यांनी उपप्रश्न उपस्थित केले.
वसई-विरार महापालिकेच्या हद्दीतील अनेक अनधिकृत बांधकामांवर महापालिकेकडून कारवाई करण्यात आली असून काही प्रकरणांमध्ये न्यायालयीन स्थगिती असल्यामुळे ती बांधकामे तात्पुरती शिल्लक राहिली आहेत. मात्र, न्यायालयाचे आदेश मिळताच तीही हटवली जातील.
सध्या पावसाळ्यामुळे काही ठिकाणी लोक वास्तव्यास असल्याने अनधिकृत बांधकामांवर त्वरित कारवाई करणे शक्य नाही. मात्र, पावसाळ्यानंतर ती बांधकामेही निष्कासित केली जातील, असेही उपमुख्यमंत्री शिंदे यांनी सांगितले.
विलेपार्ले (पूर्व) येथील बृहन्मुंबई महानगरपालिकेच्या मालकीच्या भूखंड क्र. २५६ वर अनधिकृतरित्या शेड बांधण्यात आल्याचे निदर्शनास आल्यानंतर महापालिकेकडून २४ मार्च २०२५ रोजी या शेडवर कारवाई करण्यात आली. त्यानंतर, संबंधित भूखंडावर अनधिकृत पार्किंगचे अतिक्रमण झाल्याची तक्रार महापालिकेकडे प्राप्त झाली. या तक्रारीची दखल घेत बृहन्मुंबई महानगरपालिकेने दिनांक ३ जून २०२५ रोजी त्या अतिक्रमणावर कारवाई करून अनधिकृत पार्किंग हटवले असल्याचे शिंदे यांनी यावेळी सांगितले.
अनधिकृत बांधकामांवर ‘एमआरटीपी’ कायद्यानुसार कारवाई केली जाते. सदस्यांनी त्यांच्या क्षेत्रातील अनधिकृत बांधकामाबाबत माहिती द्यावी. संबंधित ठिकाणी कारवाई करण्यात येईल. अनधिकृत बांधकामाबाबत संबंधित अधिकाऱ्यांना जबाबदार धरून त्यांच्यावरही कारवाई करण्यात येईल, असे राज्यमंत्री माधुरी मिसाळ यांनी यावेळी सांगितले.
कचरा व्यवस्थापनासाठी स्वतंत्र सेल स्थापन करणार
राज्यातील महानगरपालिका व नगरपालिका यांच्यासमोरील कचरा व्यवस्थापनातील अडचणी दूर करण्यासाठी स्वतंत्र सेल स्थापन करण्यात येईल, असे उपमुख्यमंत्री एकनाथ शिंदे यांनी विधानसभेत प्रश्नोत्तराच्या तासात सांगितले. याबाबत सदस्य विजय देशमुख यांनी प्रश्न उपस्थित केला होता.