मुंबई : वांद्रे रेक्लमेशन येथील नेव्हिल डिसूझा फुटबॉल मैदानाचे आरक्षण खेळाच्या मैदानाऐवजी ‘कन्व्हेन्शन अँड एक्झिबिशन सेंटर’साठी बदलण्याचा प्रस्ताव मुंबई महापालिकेच्या सभागृहात मंगळवारी रात्री सत्ताधारी भाजप-शिवसेना युतीच्या बहुमताने मंजूर करण्यात आला. सुधार समितीचे अध्यक्ष आणि शिवसेना नगरसेविका संध्या दोशी यांनी मांडलेला हा प्रस्ताव सभागृहाच्या अजेंडा क्रमांक २२ वर होता.
या निर्णयाला शिवसेना (उबाठा) आणि काँग्रेसच्या नगरसेवकांनी तीव्र विरोध केला. मुंबईतील मोकळ्या जागा दिवसेंदिवस कमी होत असताना आणखी एका महत्त्वाच्या मैदानाचे आरक्षण बदलून ते व्यावसायिक व कार्यक्रमांसाठी वापरण्याचा मार्ग मोकळा करणे योग्य नसल्याचा आरोप विरोधकांनी केला.
वांद्रे येथील काँग्रेसचे नगरसेवक राजा रेहबर खान यांनी या प्रस्तावाला विरोध करताना, ‘‘या मैदानावर अनेक पिढ्यांनी खेळ खेळले आहेत. सुमारे २०० क्लब या मैदानाशी जोडलेले आहेत. २००७ पासून हा माझा प्रभाग आहे. आम्ही लहानपणी याच मैदानावर फुटबॉल आणि क्रिकेट खेळलो. त्यावेळी या जागेला मैदानाचे आरक्षणही नव्हते. नगरसेवक म्हणून हे मैदान वाचवता आले नाही, तर ही लाजिरवाणी बाब आहे,’’ अशी संतप्त प्रतिक्रिया व्यक्त केली. काँग्रेसचे नेते अशरफ आझमी यांनीही प्रस्तावाला विरोध करत हा विषय मुंबई उच्च न्यायालयात प्रलंबित असल्याकडे सभागृहाचे लक्ष वेधले.