मुंबई : अंधेरी पश्चिमेतील लिंक रोडवरील चित्रकूट मैदान परिसरात अग्निशमन केंद्रासाठी आरक्षित असलेल्या भूखंडावर झालेल्या अतिक्रमणाविरोधात मुंबई महापालिकेच्या के-पश्चिम विभागाने सोमवारी मोठी कारवाई केली. या कारवाईत अनधिकृतपणे उभारण्यात आलेले गॅरेज आणि मंगल कार्यालय (मॅरेज हॉल) जमीनदोस्त करण्यात आले.
या जागेवर अग्निशमन केंद्र उभारण्यासाठी आरक्षण असतानाही अनेक वर्षांपासून विविध व्यावसायिक उपक्रम सुरू असल्याच्या तक्रारी करण्यात आल्या होत्या. स्थानिक भाजप नगरसेवक रुपेश सावारकर यांनी सांगितले की, यावर्षी निवडून आल्यानंतर त्यांनी या प्रकरणाचा पाठपुरावा सुरू केला होता. दरम्यान अग्निशमन केंद्रासाठी राखीव असलेल्या मोकळ्या जागेवरच नव्हे, तर प्रस्तावित केंद्राच्या भूखंडाच्या काही भागावरही अतिक्रमण झाल्याचे निदर्शनास आले.
सावारकर यांनी महापालिकेकडे वारंवार पाठपुरावा करून कारवाईची मागणी केली होती. त्यानंतर सोमवारी के-पश्चिम विभागाने अतिक्रमण हटविण्याची मोहीम राबवत गॅरेज आणि मंगल कार्यालय हटविले.
या कारवाईमुळे परिसरात अग्निशमन केंद्र उभारण्याच्या दिशेने एक महत्त्वाचे पाऊल उचलले गेल्याचे सावारकर यांनी म्हटले आहे. “या भागात अद्याप पूर्ण क्षमतेचे अग्निशमन केंद्र नाही. लोखंड वाला, लिंक रोड आणि आसपासचा परिसर दाट लोकवस्तीचा असल्याने आपत्कालीन परिस्थितीत अग्निशमन दलाला घटनास्थळी पोहोचण्यासाठी अधिक वेळ लागतो. त्यामुळे स्थानिक नागरिकांच्या सुरक्षेच्या दृष्टीने येथे अग्निशमन केंद्राची नितांत गरज आहे,” असे त्यांनी सांगितले.
दरम्यान, अतिक्रमण हटवल्यानंतर आता अग्निशमन केंद्राच्या उभारणीची प्रक्रिया गतीमान करण्यासाठी संबंधित विभागांकडे पाठपुरावा सुरू असल्याचेही सावारकर यांनी स्पष्ट केले. आवश्यक प्रशासकीय मंजुरी मिळताच केंद्राच्या बांधकामाला सुरुवात व्हावी, अशी मागणी स्थानिक रहिवाशांनी केली आहे.
महापालिकेच्या या कारवाईमुळे अनेक वर्षांपासून रखडलेल्या अग्निशमन केंद्राच्या प्रकल्पाला चालना मिळण्याची शक्यता निर्माण झाली असून, अंधेरी पश्चिमेतील नागरिकांमध्ये समाधान व्यक्त केले जात आहे.