मुंबईः पत्नीला पोटगीची रक्कम देण्यास टाळाटाळ करीत उत्पन्नाची दंडाधिकारी लपवालपवी करणाऱ्या पतीला बोरिवलीतील न्यायालयाने मोठा दणका दिला. घरगुती हिंसाचार कायद्याच्या प्रकरणात पतीला फटकारत न्यायालयाने अर्जदार पत्नीला दरमहा ७,००० रुपये अंतरिम पोटगी आणि ७,००० रुपये पर्यायी निवासाचे भाडे अशी एकूण १४ हजारांची रक्कम मंजूर केली.
अर्जदार महिला आणि प्रतिवादी पती यांचा विवाह २६ मे २०२२ रोजी झाला होता. लग्नानंतर काही दिवसांतच सासरच्या मंडळींनी पैशांची मागणी करत तिचा शारीरिक व मानसिक छळ सुरू केला. तिला मारहाणही केली. १६ जुलै २०२३ रोजी ३ लाख रुपयांची मागणी पूर्ण न केल्याने सासरच्यांनी तिचा गळा आवळण्याचा आणि रॉडने मारहाण करण्याचा प्रयत्न केला.
या घटनेनंतर पीडित महिला जुलै २०२३ पासून तिच्या पालकांसोबत राहत आहे. तिने नारपोली पोलीस ठाण्यात गुन्हा नोंदवला आणि बोरीवली न्यायालयात कौटुंबिक हिंसाचार कायद्यांतर्गत न्याय मागितला होता.
याचदरम्यान पतीने न्यायालयात प्रतिज्ञापत्र सादर करून तो टेम्पो चालक असल्याचे आणि त्याचे मासिक उत्पन्न ९ हजार असल्याचे सांगितले होते. त्याच्या दाव्यावर दंडाधिकारी व्ही. एफ. चौगुले यांनी प्रश्नचिन्ह उपस्थित केले.