पूनम अपराज/ मुंबई
मुंबईतील छत्रपती शिवाजी महाराज टर्मिनस स्थानकावरील मोफत सार्वजनिक वायफाय वापरल्यानंतर सायबर फसवणुकीचा धक्कादायक प्रकार समोर आला आहे.
बँक ऑफ बडोदाच्या एका महाव्यवस्थापकाच्या मोबाईलमध्ये बनावट एपीके फाइल इन्स्टॉल झाल्याने त्यांच्या क्रेडिट कार्डमधून अवघ्या २८ मिनिटांत ₹४.२७ लाखांची अनधिकृत ऑनलाइन फसवणूक करण्यात आली. या प्रकरणी एमआरए मार्ग पोलिसांनी ४ ऑगस्ट रोजी गुन्हा दाखल करून तपास सुरू केला आहे.
पोलिसांनी दिलेल्या माहितीनुसार, वडाळ्यातील भक्ती पार्क येथील हिमालयन हाइट्समध्ये राहणारे गोबिंद बिस्वास (वय ५६) हे फोर्ट येथील बँक ऑफ बडोदाच्या शाखेत महाव्यवस्थापक म्हणून कार्यरत आहेत.
सचिवाच्या मोबाईलपासून सायबर हल्ल्याची सुरुवात
१८ जुलै रोजी बिस्वास यांचे वैयक्तिक सचिव नारायण स्वामी यांनी सीएसएमटी स्थानकावरील मोफत सार्वजनिक वायफाय नेटवर्कशी आपला मोबाईल जोडला. त्याच्याशी कनेक्ट होताच त्यांच्या मोबाईलमध्ये सायबर गुन्हेगारांनी घातक मालवेअर घुसवले. त्यानंतर त्यांच्या मोबाईलमधील सर्व संपर्कांना आरटीओ एपीके चलन नावाची संशयास्पद फाइल आपोआप पाठवली गेली.
गोबिंद बिस्वास यांनी हा संदेश म्हणजे खरे चलन असल्याचा समज करून संबंधित फाइल डाउनलोड करून इन्स्टॉल केली. फाइल इन्स्टॉल होताच त्यांचाही मोबाईल हॅक झाला आणि त्यांच्या संपर्कांनाही तोच संदेश आपोआप पाठवला गेला.
२८ मिनिटांत ₹४.२७ लाखांची फसवणूक
२१ जुलै रोजी मोबाईलमध्ये संशयास्पद हालचाली दिसू लागल्यानंतर बिस्वास यांनी ही फाइल हटवली. मात्र, त्यावेळी बँकेकडून कोणताही व्यवहाराचा संदेश आला नव्हता.
३ ऑगस्ट रोजी क्रेडिट कार्डचे स्टेटमेंट मिळाल्यानंतर धक्कादायक बाब उघड झाली. २१ जुलै रोजी केवळ २८ मिनिटांत पाच अनधिकृत व्यवहारांद्वारे ₹४,२७,२६४ इतकी रक्कम खर्च करण्यात आल्याचे त्यात दिसून आले.
बँकेच्या क्रेडिट कार्ड विभागाने संशयास्पद व्यवहार लक्षात आल्यानंतर कार्डधारकाशी संपर्क साधण्याचा प्रयत्न केला. संपर्क न झाल्याने खबरदारी म्हणून संबंधित क्रेडिट कार्ड तातडीने ब्लॉक करण्यात आले.
यानंतर बिस्वास यांनी राष्ट्रीय सायबर गुन्हे नोंदणी पोर्टलवर तक्रार दाखल केली तसेच मुंबई पोलिसांकडे धाव घेतली.
एमआरए मार्ग पोलीस बनावट एपीके फाइलचा उगम, सायबर फसवणुकीची पद्धत आणि CSMT वरील सार्वजनिक वायफाय नेटवर्कचा या गुन्ह्यात कसा वापर झाला, याचा सखोल तपास करत आहेत.