मुंबई लोकलमध्ये क्षणभराची चूक किती महागात पडू शकते, याचा प्रत्यय कुर्ला स्थानकावर आला. धावत्या गाडीत चढण्याच्या प्रयत्नात एका महिलेचा तोल जाऊन ती ट्रेन आणि प्लॅटफॉर्मच्या मधोमध पडणार होती. मात्र त्याचवेळी प्रसंगावधान राखत एका रेल्वे कर्मचाऱ्याने धाव घेतली आणि त्या महिलेला वाचवले. हा थरारक प्रसंग स्थानकावरील सीसीटीव्हीत कैद झाला असून त्याचा व्हिडिओ सोशल मीडियावर व्हायरल होत आहे.

नेमकं काय घडलं?

७ फेब्रुवारी २०२६ रोजी दुपारी सुमारे १२.३० वाजता कुर्ला स्थानकावर लोकल आली. प्रचंड गर्दीमुळे एका महिलेने धावत्या लोकलमध्ये चढण्याचा प्रयत्न केला. मात्र, दरवाज्यात चढतानाच तिचा तोल गेला. ती ट्रेन व प्लॅटफॉर्मच्या मधोमध पडणार, त्याचवेळी सुदैवाने ड्युटीवर असलेले जॉन पॉल (CCTC, कुर्ला) जवळून जात होते. त्यांनी हे बघताच प्रसंगावधान राखत तत्काळ धाव घेत महिलेला सुरक्षित बाहेर खेचलं. क्षणभराचा उशीरही त्या महिलेच्या जीवावर बेतला असता.

रेल्वे प्रशासनाकडून कौतुक

मुंबई विभागाचे विभागीय रेल्वे व्यवस्थापक (DRM) यांनी 'एक्स'वर पोस्ट करत जॉन पॉल यांच्या धाडसाचं कौतुक केलं आहे. त्यांनी पोस्टमध्ये म्हंटलं, "जॉन पॉल यांनी दाखवलेलं धैर्य आणि तत्परता वाखाणण्याजोगी आहे." जीव वाचवल्यामुळे संबंधित महिलेनेही जॉन पॉल यांचे आभार मानले आहेत, तर रेल्वे प्रशासनाने नागरिकांना सावधगिरी बाळगण्याचं आवाहन केलं आहे.

मुंबई लोकल ही शहराची लाईफलाईन जरी असली तरी अशा निष्काळजीपणामुळे जीव धोक्यात येऊ शकतो. त्यामुळे प्रत्येक प्रवाशाने स्वतःची जबाबदारी ओळखणं अत्यंत गरजेचं आहे.