मुंबई : डबेवाला संघटनेने मांडलेल्या मागण्या मार्गी लावण्यासाठी सर्वतोपरी प्रयत्न करण्यात येतील, अशी ग्वाही मुंबईच्या महापौर रितू तावडे यांनी दिली. तसेच, नोंदणीकृत डबेवाल्यांना वैद्यकीय उपचारांसाठी महापौर वैद्यकीय सहायता निधीतून रुपये २५ हजार मदत तत्काळ प्रदान करण्यात येईल, अशी घोषणाही महापौरांनी केली आहे.
मुंबई डबेवाला संघटना (मुंबई टिफीन बॉक्स सप्लायर्स असोसिएशन) शिष्टमंडळाने आपल्या विविध मागण्यांसंदर्भात मुंबईच्या महापौर रितू तावडे यांची, बृहन्मुंबई महानगरपालिका मुख्यालयातील महापौर दालनात सोमवारी भेट घेतली. त्यावेळी महापौरांनी घोषणा केली.
यावेळी आमदार श्रीकांत भारतीय, महानगरपालिका आयुक्त अश्विनी भिडे, सभागृह नेते गणेश खणकर, स्थायी समिती अध्यक्ष प्रभाकर शिंदे, शिक्षण समिती अध्यक्ष राजेश्री शिरवाडकर, तसेच नूतन मुंबई टिफिन बॉक्स सप्लायर्स चॅरिटेबल ट्रस्टचे अध्यक्ष उल्हास मुके आणि डबेवाला संघटनेचे सदस्य उपस्थित होते.
डबेबाला भवन निशुल्क करण्याची मागणी
वांद्रे (पश्चिम) येथील रिझवी महाविद्यालय परिसरात असलेले डबेवाला भवन अर्थात मुंबई डबेवाला आंतरराष्ट्रीय अनुभव केंद्र हे महानगरपालिकेने निःशुल्क करून द्यावे, डबेवाला भवनासाठी आत्तापर्यंत महानगरपालिकेकडून आकारण्यात आलेले सर्व भाडे विशेष बाब म्हणून पूर्णपणे माफ करण्यात यावे, डबेवाला भवन परिसरातील रस्त्यास संघटनेचे संस्थापक कै. महादू हावजी बच्चे यांचे नाव देण्यात यावे, मुंबईतील प्रमुख रेल्वे स्थानकांजवळ डबेवाल्यांसाठी स्वतंत्र आणि सुरक्षित सायकल पार्किंगची सुविधा उपलब्ध करून देण्यात यावी, चर्चगेट रेल्वे स्थानकासमोरील ऐतिहासिक स्थळाचा मुंबई डबेवाला पर्यटक केंद्र म्हणून विकास करण्यात यावा, अशा मागण्या संघटनेने केल्या आहेत.