गोव्यात इंटरनॅशनल फिल्म फेस्टिव्हल ऑफ इंडियामध्ये (IFFI 2022) हेड ज्युरी असलेले इस्रायली चित्रपट निर्माते नदव लॅपिड यांनी 'दि काश्मीर फाईल्स'चे वर्णन 'अश्लील प्रोपेगेंडा' असल्याचे म्हंटले. यावर देशभरातून अनेकांनी आपले मते मांडली. आता यामध्ये राष्ट्रवादी काँग्रेसचे नेते जितेंद्र आव्हाड (Jitendra Awhad) यांनीदेखील उडी घेतली आहे. यापूर्वीही त्यांनी चित्रपट प्रदर्शित झाल्यानंतर 'दि काश्मीर फाईल्स' हा भाजपचा चित्रपट असल्याची टीका केली होती.
राष्ट्रवादीचे नेते जितेंद्र आव्हाड यांनी ट्विट केले आहे की, "तो इस्रायली असल्याने मुस्लिम विरोधी 'काश्मीर फाईल्स' चालवून घेईल अशी सरकारची अपेक्षा होती. पण 'प्रचारकी आणि गलिच्छ' चित्रपट म्हणून मुख्य परीक्षक नदव लॅपिडने सणसणीत चपराक लगावली. " असा टोला त्यांनी लगावला आहे.
गोव्यातील पणजीमध्ये सुरु असलेल्या इफ्फीमध्ये नदव लॅपिड यांनी म्हंटले की, "आम्ही सर्व नाराज आहोत. हा चित्रपट आम्हाला प्रोपगंडा आणि वलगर वाटला. एवढ्या मोठ्या प्रतिष्ठित महोत्सवासाठी काश्मीर फाइल्स योग्य नाही. मी व्यासपीठावर माझ्या भावना मोकळेपणाने सांगू शकतो. ही एक महत्त्वाची चर्चा आहे, जी न डगमगता व्हायला हवी. कला आणि जीवनासाठी ते आवश्यक आहे."