मोखाडा : मोखाडा तालुक्यातील आडोशी येथील जिल्हा परिषदेच्या शाळेत जाणाऱ्या १२ वर्षीय विद्यार्थिनीला भरधाव इको कारने चिरडल्याने तिचा जागीच मृत्यू झाला. सोनम युवराज खरपडे असे मृत विद्यार्थिनीचे नाव असून ती इयत्ता सहावीमध्ये शिकत होती.
पोलिसांनी दिलेल्या माहितीनुसार, शाळेच्या आवारात पांढऱ्या रंगाची कार उभी होती. आडोशी येथील शंकर किसन घाटाळ (३६) याने चालकाकडून चावी घेऊन कार सुरू केली. कार सुरू करताच त्याचा वाहनावरील ताबा सुटला आणि भरधाव कार शाळेच्या आवारात खेळत व शाळेत जाणाऱ्या विद्यार्थिनींच्या दिशेने गेली. इतर मुलींनी प्रसंगावधान राखून बाजूला धाव घेतली; मात्र सोनमला बाजूला होता न आल्याने कारने तिला जोरदार धडक दिली. गंभीर दुखापतीमुळे तिचा जागीच मृत्यू झाला.
या प्रकरणी सोनमचे वडील युवराज खरपडे यांच्या फिर्यादीवरून मोखाडा पोलीस ठाण्यात गुन्हा दाखल करण्यात आला आहे. दरम्यान, घटनेनंतर जिल्हा शिक्षणाधिकारी (प्राथमिक) मातेकर यांनी शाळेला भेट देऊन पाहणी केली. शाळेसाठी कंपाऊंड वॉलचा प्रस्ताव संबंधित योजनेतून तातडीने सादर करण्याच्या सूचना त्यांनी दिल्या. तसेच मृत विद्यार्थिनीच्या कुटुंबीयांना राजीव गांधी अपघात विमा योजनेचा लाभ मिळवून देण्यासाठी कार्यवाही करण्याचे निर्देश दिले आहेत.