पालघर : पालघर जिल्ह्यात २ जुलै रोजी अतिवृष्टीची शक्यता लक्षात घेऊन हवामान विभागाने 'रेड अलर्ट' जारी केला आहे. पुढील पाच दिवस जिल्ह्यात अनेक ठिकाणी जोरदार ते अति जोरदार पावसाची शक्यता वर्तविण्यात आली असून काही ठिकाणी अतिमुसळधार पाऊस पडण्याचा अंदाज आहे. दरम्यान, विद्यार्थ्यांच्या सुरक्षिततेचा विचार करून पालघर जिल्ह्यातील सर्व शाळा आणि महाविद्यालयांना २ जुलै २०२६ रोजी सुट्टी जाहीर करण्यात आली आहे. हा निर्णय संभाव्य अतिवृष्टी आणि रेड अलर्टच्या पार्श्वभूमीवर घेण्यात आला असल्याचे जिल्हाधिकारीनी आदेशात म्हटले आहें.
संभाव्य अतिवृष्टीच्या पार्श्वभूमीवर जिल्हा प्रशासनाने नागरिकांना अत्यावश्यक कामाशिवाय घराबाहेर न पडण्याचे, नदी-नाले, धबधबे आणि समुद्रकिनाऱ्यापासून सुरक्षित अंतर राखण्याचे आवाहन केले आहे. सखल भागात राहणाऱ्या नागरिकांनी विशेष सतर्कता बाळगावी तसेच प्रशासनाच्या सूचनांचे पालन करावे, असेही प्रशासनाने स्पष्ट केले आहे.जिल्हा प्रशासनाने नागरिकांनी अफवांवर विश्वास न ठेवता अधिकृत सूचनांचे पालन करावे आणि कोणत्याही आपत्कालीन परिस्थितीत स्थानिक प्रशासनाशी संपर्क साधावा, असे आवाहन केले आहे.