मुंबई : मुंबईच्या आझाद मैदानावर येत्या ५ ऑक्टोबर पासून ‘शाळा वाचवा, शिक्षण वाचवा’ बेमुदत धरणे आंदोलन होत आहे. या आंदोलनात सर्व ताकदीनिशी मोठ्या संख्येने उपस्थित राहून हे आंदोलन यशस्वी करण्याचा निर्धार कोकणातील मुंबईकर चाकरमान्यांनी केला आहे.
‘शाळा वाचवा, शिक्षण वाचवा’ आंदोलनाच्या तयारीसाठी शाळा वाचवा शिक्षण वाचवा मंच महाराष्ट्राच्या वतीने २७ सप्टेंबर रोजी, परळ येथे मुंबईत राहणाऱ्या कोकणातील चाकरमान्यांची बैठक आयोजित करण्यात आली होती. मुंबईतील या बैठकीला 'शाळा वाचवा ,शिक्षण वाचवा ' मंच महाराष्ट्राचे निमंत्रक संजय वेतुरेकर यांनी मार्गदर्शन केले.
‘सरकार भांडवलदार आणि शिक्षण सम्राट यांच्या हितासाठी सरकारी शाळा बंद करत आहे. शाळा बंद झाल्या तर गाव खेड्यातल्या आणि शहर महानगरातल्या कष्टकरी वर्गातील मुलं शिक्षणापासून वंचित राहणार आहेत मुलींच्या शिक्षणाचा गंभीर प्रश्न येत्या काळात उभा राहील उभा राहील. येत्या ५ ऑक्टोबर पासून मुंबईच्या आझाद मैदानावर राज्यव्यापी 'शाळा वाचवा शिक्षण वाचवा' बेमुदत धरणे आंदोलन करत आहोत.