आंध्र प्रदेशातील पश्चिम गोदावरी जिल्ह्यात गुरुवारी रात्री हृदय पिळवटून टाकणारी घटना घडली. एका दाम्पत्याने आपल्या ३ वर्षांच्या मुलाला पुलावर एकटं सोडून गोदावरी नदीत उडी घेतल्याचा प्रकार उघडकीस आला आहे. रात्रीच्या अंधारात पुलावर एकटाच रडत असलेल्या मुलाकडे जाणाऱ्यांचे लक्ष गेले. "अम्मा... नाना..." म्हणत आई-वडिलांना हाक मारणाऱ्या या चिमुकल्याला अखेर पोलिसांनी ताब्यात घेत कुटुंबीयांकडे सुरक्षित सुपूर्द केले. दरम्यान, नदीत बेपत्ता झालेल्या दाम्पत्याचा शोध सुरू आहे.
मुलाला स्कूटरजवळ सोडून नदीत उडी
ही घटना चिंचिनाडा वशिष्ठ पुलावर गुरुवारी रात्री घडली. दोड्डा साई (२९) आणि त्यांची पत्नी शिरीषा (२८) हे वेलपुरू गावातील रहिवासी आहेत. पोलिसांच्या प्राथमिक माहितीनुसार, दोघे रात्री सुमारे १० वाजता ३ वर्षांच्या मुलासह स्कूटरवरून पुलावर आले. त्यानंतर मुलाला स्कूटरजवळ सोडून दोघांनी दुथडी भरून वाहणाऱ्या गोदावरी नदीत उडी मारली असल्याचे सांगितले जात आहे.
काही वेळाने पुलावरून जाणाऱ्या नागरिकांना मुलाच्या रडण्याचा आवाज ऐकू आला. तो आई-वडिलांना "अम्मा... नाना..." अशी हाक मारत होता. नागरिकांनी पोलिसांना माहिती दिल्यानंतर पोलिसांनी घटनास्थळी पोहोचून मुलाला ताब्यात घेतले आणि त्याला नातेवाईकांकडे सोपवले. पोलिसांनी स्थानिक बचाव पथक, जलतरणपटू आणि बोटींच्या मदतीने नदीत शोध मोहीम सुरू केली आहे. हे वृत्त प्रसिद्ध होईपर्यंत या जोडप्याचा शोध लागला नव्हता.
घटनेमागे आर्थिक अडचणींचा संशय
प्राथमिक तपासात समोर आलेल्या माहितीनुसार, दोड्डा साई (वडील) चालक म्हणून काम करत होते. काही काळ ते आखाती देशातही कामासाठी गेले होते. मात्र, वाढतं कर्ज आणि आर्थिक तणावामुळे त्यांनी घर विकण्याचा निर्णय घेतला होता, अशी माहिती समोर आली आहे. दरम्यान, या घटनेमागचं एकमेव कारण आर्थिक अडचणी असल्याचं पोलिसांनी अद्याप अधिकृतपणे स्पष्ट केलेलं नाही. या प्रकरणी पोलिसांनी नोंद घेतली असून, दाम्पत्याने हे टोकाचं पाऊल का उचललं, याचा पुढील तपास सुरू आहे.