नवी दिल्ली : दिल्ली पोलिसांनी काँग्रेसला १ नोव्हेंबर रोजी रामलीला मैदानावर रॅली आयोजित करण्याची परवानगी दिली असून, त्यासाठी 'ना-हरकत प्रमाणपत्र' जारी केले आहे, अशी माहिती शनिवारी एका वरिष्ठ पोलीस अधिकाऱ्याने दिली. पोलीस उपायुक्त (मध्य) रोहित राजबीर सिंग म्हणाले, काँग्रेसने १ नोव्हेंबर रोजी रामलीला मैदानावर रॅलीचे नियोजन केले असून, त्यासाठी त्यांनी दिल्ली पोलिसांकडे 'ना-हरकत प्रमाणपत्रा'ची मागणी केली होती. निर्धारित निदर्शन स्थळावर रॅली आयोजित करण्यासाठी २५ ऑक्टोबर ते ३ नोव्हेंबर या कालावधीसाठी हे प्रमाणपत्र जारी करण्यात आले आहे.
पोलीस प्रशासनाने सांगितले की, कायदा व सुव्यवस्था राखण्यासाठी, वाहतुकीचे योग्य नियोजन करण्यासाठी आणि प्रस्तावित रॅली सुरळीत पार पाडण्यासाठी दिल्ली पोलीस आयोजक, वाहतूक पोलीस आणि इतर संबंधित यंत्रणांशी सतत समन्वय साधत आहेत.