उत्तर प्रदेशातील फतेहपूर जिल्ह्यातून धक्कादायक ऑनर किलिंगची घटना समोर आली आहे. एका तरुणाने आपल्या १९ वर्षीय सख्ख्या बहिणीची गळा आवळून हत्या केल्याचा आरोप आहे. विशेष म्हणजे, हत्या केल्यानंतर त्याने मृतदेह विहिरीत फेकून दिला आणि स्वतः पोलिसांकडे जाऊन गुन्ह्याची कबुली दिली. मृत तरुणीचे नाव रंजू यादव (वय १९) असून आरोपी भाऊ संदीप यादव (वय २२) याला पोलिसांनी ताब्यात घेतले आहे.
अवघ्या ४४ दिवसांपूर्वी झाले होते लग्न
पोलिसांनी दिलेल्या माहितीनुसार, रंजूचे १ मे २०२६ रोजी अजय यादव उर्फ पिंटू याच्यासोबत लग्न झाले होते. मात्र काही कौटुंबिक कारणांमुळे पती-पत्नीमध्ये वाद सुरू होते. त्यामुळे संदीप तिला सासरहून माहेरी घेऊन येत होता. दरम्यान, रंजू दुसऱ्या जातीतील एका तरुणाच्या संपर्कात असल्याचा संशय संदीपला होता. यावरून दोघांमध्ये वारंवार वाद होत होते.
जंगलात भेटल्याचा संशय
तपासादरम्यान समोर आलेल्या माहितीनुसार, संबंधित तरुण जवळच्या जंगल परिसरात असल्याची माहिती संदीपला मिळाली. त्यानंतर तो तेथे गेला असता रंजू आणि तो तरुण एकत्र दिसल्याचा दावा करण्यात येत आहे. तरुण तेथून पळून गेल्यानंतर संतापलेल्या संदीपने रंजूचा गळा आवळून तिची हत्या केल्याचा आरोप आहे.
मृतदेह विहिरीत फेकला
हत्या केल्यानंतर आरोपीने बहिणीचा मृतदेह जवळच्या विहिरीत फेकून दिला. त्यानंतर तो थेट पोलिस चौकीत गेला आणि संपूर्ण घटनेची कबुली दिली. या कबुलीनंतर पोलिसांनी घटनास्थळी धाव घेत मृतदेह विहिरीतून बाहेर काढला. मृतदेह शवविच्छेदनासाठी पाठवण्यात आला आहे.
आरोपी अटकेत, तपास सुरू
पोलिसांनी आरोपी संदीप यादव याला अटक केली असून या प्रकरणाचा सखोल तपास सुरू आहे. तसेच घटनास्थळावरून पळून गेलेल्या तरुणाचाही शोध घेतला जात आहे. या घटनेमुळे परिसरात खळबळ उडाली असून अवघ्या ४४ दिवसांपूर्वी लग्न झालेल्या तरुणीचा स्वतःच्या भावाकडून झालेला खून हृदयद्रावक असल्याची भावना व्यक्त केली जात आहे.