नवी दिल्ली : संसदेचे पावसाळी अधिवेशन संस्थगित करण्यामधील 'अभूतपूर्व' विलंबावर आक्षेप घेत काँग्रेस अध्यक्ष मल्लिकार्जुन खर्गे यांनी शुक्रवारी पंतप्रधान नरेंद्र मोदी यांना पत्र लिहिले आहे. सीमांकनाच्या कोणत्याही नवीन प्रस्तावावर चर्चा करण्यासाठी सर्वपक्षीय बैठक बोलावण्यात यावी, अशी मागणी त्यांनी केली आहे.
तसेच, देशावर दूरगामी परिणाम करणाऱ्या 'घटनादुरुस्ती विधेयकावर' घाईघाईने निर्णय लादण्याचा कोणताही प्रयत्न करू नका, असा इशाराही खर्गे यांनी मोदींना दिला आहे.
मोदींना पाठवलेल्या पत्रात खर्गे यांनी नमूद केले की, १३ ऑगस्ट रोजी पावसाळी अधिवेशन अनिश्चित काळासाठी (साईन डाय) संस्थगित झाल्यानंतर आतापर्यंत ६४ दिवस झाले आहेत, तरीही संसदेची दोन्ही सभागृहे अद्याप अधिकृतपणे संस्थगित करण्यात आलेली नाहीत. ही परिस्थिती 'अभूतपूर्व' आहे, सीमांकनावर कोणतेही घटनादुरुस्ती विधेयक आणण्यापूर्वी सर्वपक्षीय बैठक बोलावण्याबाबत आपण सर्वप्रथम ११ एप्रिल रोजी पंतप्रधानांना पत्र लिहिले होते, अशी आठवण त्यांनी करून दिली.
पुरेसा वेळ हवा
राजकीय पक्षांना एकमेकांसोबत चर्चा करण्यासाठी पुरेसा वेळ मिळाला पाहिजे. यापूर्वी ज्याप्रमाणे तुम्ही घाईघाईने घटनादुरुस्ती विधेयक संसदेत मंजूर करून घेण्याचा प्रयत्न केला होता आणि ज्या विधेयकाचा योग्य तोच निकाल लागला. तसा प्रकार कृपया पुन्हा करू नका, असा इशारा खर्गे यांनी दिला आहे.