नवी दिल्ली : अमेरिकेने भारतीय जहाजावर केलेल्या हल्ल्यात तीन भारतीय खलाशांचा मृत्यू झाल्यानंतर अमेरिकेकडून आलेल्या विधानांवरून काँग्रेसने रविवारी पंतप्रधान नरेंद्र मोदी यांच्यावर जोरदार टीका केली आहे. विरोधी पक्षनेते राहुल गांधी यांनी म्हटले आहे की, हे ‘तडजोडवादी पंतप्रधान’ एखाद्या ‘आज्ञाधारक नोकराप्रमाणे’ ऐकतात आणि ‘आदेशांचे पालन करतात’.
काँग्रेस अध्यक्ष मल्लिकार्जुन खर्गे यांनीही तीन भारतीय खलाशांच्या मृत्यूवर पंतप्रधान मोदींच्या ‘मौना’बद्दल त्यांच्यावर हल्लाबोल केला. त्यांनी भारताची जागतिक प्रतिष्ठा आणि सार्वभौमत्वाला धक्का लावला आहे. यासाठी आता कोणत्याही पुराव्याची गरज उरलेली नाही.
काँग्रेसने म्हटले की, भारताने अमेरिकेचे व्यापार प्रतिनिधी जेमिसन ग्रीर यांचा आगामी दौरा पुढे ढकलला पाहिजे. तसेच कोणत्याही स्वाभिमानी देशाने ‘धमकावणाऱ्यां’विरुद्ध आपले सार्वभौमत्व राखण्यासाठी केवळ फोन कॉल्स आणि प्रसिद्धीपत्रकांपेक्षा अधिक काही पावले उचलली पाहिजेत, असे स्पष्ट केले.