नवी दिल्ली : टाटा ग्रुपची होल्डिंग कंपनी असलेल्या टाटा सन्सची मंगळवारची प्रस्तावित वार्षिक सर्वसाधारण सभा तहकूब होण्याची शक्यता आहे. टाटा सन्सचा मुख्य भागधारक असलेल्या सर रतन टाटा ट्रस्टला महाराष्ट्राच्या चॅरिटी कमिशनरने लादलेल्या नियामक निर्बंधांमुळे आपला प्रतिनिधी नामनिर्देशित करता आलेला नाही, अशी माहिती आहे.
या बैठकीत इतर विषयांसोबतच टाटा सन्सचे अध्यक्ष एन. चंद्रशेखरन यांच्या संचालक पदाच्या पुनर्नियुक्तीवर विचार केला जाणार आहे. चंद्रशेखरन यांचा सध्याचा कार्यकाळ फेब्रुवारीमध्ये संपत असून त्यांनी पुढील कार्यकाळ न स्वीकारण्याचा निर्णय घेतला आहे. टाटा सन्सने एजीएमच्या नियोजित तारखेत कोणताही बदल झाल्याचे भागधारकांना कळवलेले नाही आणि कंपनी बैठकीची प्रक्रिया पुढे सुरू ठेवेल. परंतु आवश्यक गणसंख्या पूर्ण न झाल्यास ती तहकूब करेल, असे समजते. कंपनीने यापूर्वी दिलेल्या सूचनेनुसार, ही वार्षिक सर्वसाधारण सभा मंगळवार, १८ ऑगस्ट रोजी दुपारी २.३० वाजता व्हिडीओ कॉन्फरन्सिंग किंवा इतर ऑडिओ-व्हिज्युअल माध्यमाद्वारे आयोजित केली गेली आहे.