आंध्र प्रदेशातील तिरुपती येथे शनिवारी (दि. ०३) सकाळी भीषण दुर्घटना घडली. श्री सिटीमधील एका औषध निर्मिती कंपनीत बॉयलरचा स्फोट झाला. या दुर्घटनेत आतापर्यंत ५ जणांचा मृत्यू झाला असून, १० जण गंभीर जखमी झाले आहेत. स्फोटाची तीव्रता इतकी होती की कंपनीच्या परिसराचे मोठ्या प्रमाणात नुकसान झाले असून, सर्वत्र ढिगारा पसरला आहे. घटनेची माहिती मिळताच पोलीस आणि आपत्कालीन पथके घटनास्थळी दाखल झाली. जखमींना बाहेर काढून जवळच्या रुग्णालयात दाखल करण्यात आले असून, मदत आणि बचावकार्य सुरू आहे.
ही दुर्घटना तिरुपतीतील सत्यवेडू मंडल अंतर्गत येणाऱ्या श्री सिटी परिसरात घडली. स्फोटाच्या वेळी कंपनीत नेमके किती कर्मचारी उपस्थित होते, याची माहिती अद्याप स्पष्ट झालेली नाही.
स्फोटानंतर सर्वत्र ढिगारा
घटनास्थळाचे व्हिडिओ सोशल मीडियावर समोर आले आहेत. स्फोटानंतर कंपनीच्या परिसरात मोठ्या प्रमाणात ढिगारा पसरल्याचे त्यामध्ये दिसत आहे. पोलीस आणि आपत्कालीन पथकांकडून घटनास्थळी शोध आणि बचावकार्य केले जात आहे. स्फोटात जखमी झालेल्या १० जणांची प्रकृती गंभीर असल्याचे सांगण्यात येत आहे. त्यांच्यावर जवळच्या रुग्णालयांमध्ये उपचार सुरू आहेत.
मृतांपैकी काहींची ओळख पटली
मिळालेल्या माहितीनुसार, मृतांपैकी गौरव रॉय (३५), चिन्ना मस्तान (३६) आणि रमेश (४०) अशी तिघांची ओळख पटली आहे. तर गंभीर जखमी झालेल्या वासू (३६) यांचा रुग्णालयात उपचारादरम्यान मृत्यू झाल्याचे 'डेक्कन क्रॉनिकल'च्या वृत्तात म्हटले आहे. अन्य मृत व्यक्तीची ओळख पटवण्याची प्रक्रिया सुरू आहे.
स्फोट नेमका कशामुळे?
बॉयलरचा स्फोट नेमका कशामुळे झाला, हे अद्याप स्पष्ट झालेले नाही. बॉयलरमध्ये तांत्रिक बिघाड झाला होता की दुर्घटनेमागे अन्य काही कारण होते, याचा तपास सुरू आहे. स्फोटाच्या वेळी कंपनीत नेमके किती कर्मचारी उपस्थित होते, याची माहितीही प्रशासनाकडून गोळा केली जात आहे.
दरम्यान, पोलीस आणि आपत्कालीन यंत्रणांकडून घटनास्थळी मदत आणि बचावकार्य सुरू आहे. जखमींवर रुग्णालयात उपचार सुरू असून, स्फोटाचे नेमके कारण आणि दुर्घटनेचा संपूर्ण घटनाक्रम स्पष्ट करण्यासाठी पुढील तपास केला जात आहे.