नवी दिल्ली : भारताचा डावखुरा अष्टपैलू अक्षर पटेल आजारामुळे दक्षिण आफ्रिकेविरुद्धच्या उर्वरित २ टी-२० सामन्यांना मुकणार आहे. त्याच्या जागी शाहबाझ अहमदचा भारतीय संघात समावेश करण्यात आला आहे.

भारत-आफ्रिका यांच्यात पाच सामन्यांची टी-२० मालिका सुरू आहे. सूर्यकुमार यादवच्या नेतृत्वात खेळणाऱ्या भारताने या मालिकेत २-१ अशी आघाडी घेतली आहे. प्रकृती बिघडल्याने अक्षर तिसऱ्या सामन्याला मुकला होता. बुधवारी उभय संघांत चौथा सामना होणार आहे. मात्र अक्षर या दोन्ही लढतीसाठी अनुपलब्ध असेल, असे बीसीसीआयने जाहीर केले. त्यामुळे ३१ वर्षीय शाहबाझला संधी लाभली आहे.

दोन वर्षांनंतर टीम इंडियात वर्णी

शाहबाझने भारतासाठी २ टी-२० व ३ एकदिवसीय सामने खेळले आहेत. शाहबाझ सध्या मुश्ताक अली स्पर्धेत बंगालकडून खेळत आहे. भारतासाठी तो २०२३मध्ये अखेरचा टी-२० सामना खेळला आहे. आयपीएलमध्ये शाहबाझने बंगळुरू, हैदराबाद संघांचे प्रतिनिधित्व केलेले आहे.

लखनौ येथे उभय संघांतील चौथा टी-२० सामना खेळवण्यात येणार आहे, त्यानंतर अहमदाबादला पाचवी लढत होईल.