हॅमिल्टन : शुभमन गिलच्या नेतृत्वात खेळणारा भारतीय संघ मंगळवारी न्यूझीलंडविरुद्धच्या एकदिवसीय मालिकेत ३-० अशी विजयी आघाडी घेण्याच्या निर्धाराने मैदानात उतरेल. मात्र दिवाळी पाडव्याच्या शुभ मुहूर्तावर होणाऱ्या या लढतीसाठी पावसाचे पारडे जड मानले जात आहे. त्यामुळे चाहत्यांचा हिरमोड होण्याची शक्यता नाकारता येत नाही. हॅमिल्टन येथील सेडन पार्क येथे तिसरा सामना खेळवण्यात येणार आहे.
नवरात्रोत्सव उत्साहात पार पडल्यानंतर येथे भारताच्या न्यूझीलंडवारीला प्रारंभ झाला होता. २२ ऑक्टोबरपासून भारतीय संघ न्यूझीलंड दौऱ्यावर असून त्यांनी सलग तिसऱ्यांदा टी-२० मालिका जिंकण्याचा पराक्रम केला. श्रेयस अय्यरच्या नेतृत्वात भारताने टी-२० मालिकेत ३-२ अशी बाजी मारली. या दौऱ्यात ५ एकदिवसीय व २ कसोटी सामन्यांचा देखील समावेश आहे. आता टी-२० मालिकेनंतर एकदिवसीय मालिकेचा थरार सुरू आहे. त्यामुळे एकीकडे भारतातील चाहते दिवाळी साजरी करत असतानाच त्यांचे न्यूझीलंडमध्येही लक्ष लागून आहे. रोहित शर्मा आणि विराट कोहली यांच्या कारकीर्दीतील हा अखेरचा न्यूझीलंड दौरा ठरू शकतो.
दरम्यान, भारताने मालिकेत २-० अशी आघाडी घेतली असली, तरी न्यूझीलंडमधील वेगवान गोलंदाजांना अनुकूल वातावरण भारतीय फलंदाजांसाठी आव्हानात्मक ठरण्याची शक्यता आहे. पहिल्या लढतीत विराटचे अर्धशतक व गोलंदाजांनी केलेल्या प्रभावी माऱ्याच्या बळावर भारताने बाजी मारली, तर दुसऱ्या लढतीत गुर्नूर ब्रारने कमाल केली. फलंदाजीत भारताची नक्कीच काहीशी भंबेरी उडाली होती. मात्र डकवर्थ लुईस नियमाने भारताला तारले.
पहिल्या दोन सामन्यांमध्ये विराटचा अपवाद वगळता कर्णधार शुभमन आणि रोहित यांच्यासह अन्य फलंदाजांना अपेक्षित कामगिरी करता आलेली नाही. विशेषतः रोहितला पहिल्या सामन्यात भोपळाही फोडता आला नाही, तर दुसऱ्या सामन्यात त्याने केवळ २३ धावा केल्या. त्यामुळे तिसऱ्या सामन्यात त्याच्याकडून मोठ्या खेळीची अपेक्षा असेल.
रोहितने गेल्या वर्षभरात आपल्या फलंदाजीच्या शैलीत बदल केला आहे. सुरुवातीला संयमाने खेळून नंतर आक्रमक फलंदाजी करण्यावर त्याचा भर आहे. मात्र, २०२३ च्या विश्वचषकापूर्वी दिसणाऱ्या त्याच्या आक्रमक शैलीच्या तुलनेत या नव्या दृष्टिकोनातून संमिश्र यश मिळाले आहे. न्यूझीलंडमधील प्रतिकूल परिस्थितीत सातत्याने धावा करून टीकाकारांना उत्तर देण्याचे आव्हान त्याच्यासमोर आहे.
हॅमिल्टनमधील सेडन पार्कची खेळपट्टी वेगवान गोलंदाजांना मदत करण्याची शक्यता आहे. थंड आणि पावसाळी वातावरणामुळे चेंडूला अधिक स्विंग आणि उसळी मिळू शकते. अशा परिस्थितीत भारतीय फलंदाजांची खरी परीक्षा होईल. सोमवारी पावसामुळे दोन्ही संघांचे सराव सत्र रद्द झाले. तसेच मंगळवारीही दिवसभर पावसाची शक्यता वर्तवण्यात आली आहे.
एकूणच भारताच्या कसोटी संघातील काही खेळाडूंसाठी हा न्यूझीलंड दौऱ्यातील अखेरचा एकदिवसीय सामना असेल. अशा स्थितीत मंगळवारीच मालिकेत ३-0 अशी आघाडी घेण्यासाठी भारतीय संघ उत्सुक असेल. फक्त पाऊस खलनायक ठरू शकतो.
किवी संघाच्या फलंदाजांची कसोटी
न्यूझीलंडची फलंदाजी पूर्णपणे अपयशी ठरली आहे. डेव्हॉन कॉन्वेच्या दुखापतीमुळे आणि रचिन रवींद्रच्या अनुपस्थितीमुळे संघाच्या अडचणी वाढल्या आहेत. टॉम लॅथम आणि हेन्री निकोल्स यांनाही धावा करता आलेल्या नाहीत. ब्लेअर टिकनरच्या अनुपस्थितीत न्यूझीलंडने क्रिस्टियन क्लार्कला संघात बोलावले आहे. लॅथम आणि निकोल्स यांच्यासाठी तिसरा सामना कसोटी मालिकेपूर्वी फॉर्म मिळवण्याची अखेरची संधी असेल. मात्र, भारतीय संघाचा आत्मविश्वास पाहता मिचेल सँटनरच्या नेतृत्वाखालील न्यूझीलंडसमोर मोठे आव्हान असेल.
रोहित, श्रेयसकडून मोठी खेळी अपेक्षित
रोहित व श्रेयस यांच्याकडून मोठी खेळी अपेक्षित आहे. दोघांनीही दोन लढतींमध्ये फारशी चमक दाखवलेली नाही. कर्णधार गिलसाठीही हा सामना महत्त्वाचा आहे. मालिकेतील अखेरचे दोन सामने तो खेळणार नसून, आगामी कसोटी मालिकेच्या तयारीसाठी तो कसोटी संघात सहभागी होणार आहे. उर्वरित दोन सामन्यांत श्रेयस संघाचे नेतृत्व करेल.
फलंदाजीच्या क्रमवारीत अक्षर पटेलला के. एल. राहुलच्या आधी पाचव्या क्रमांकावर पाठवण्याच्या निर्णयाचा प्रशिक्षक गौतम गंभीर पुनर्विचार करू शकतात. वेलिंग्टनमधील दुसऱ्या सामन्यात राहुलने नाबाद २६ धावांची महत्त्वपूर्ण खेळी करून संघाला सावरले होते. उर्वरित दोन सामन्यांत ईशान किशन यष्टिरक्षणाची जबाबदारी सांभाळण्याची शक्यता आहे.
गुर्नूर, कंबोजसह वेगवान चौकडी लयीत
भारतीय वेगवान गोलंदाजांनी आतापर्यंत प्रभावी कामगिरी केली आहे. आकिब नबी, गुर्नूर ब्रार, अंशुल कंबोज आणि अर्शदीप सिंग यांनी सातत्याने विकेट मिळवत आपली छाप पाडली आहे. पहिल्या लढतीत कंबोज सामनावीर ठरला, तर दुसऱ्या सामन्यात ब्रारने ४ बळी मिळवून हा पुरस्कार पटकावला. दोन्ही सामन्यांत भारताने न्यूझीलंडला २०० धावांच्या आत गारद केले. तसेच दोन्ही लढतींमध्ये भारतानेच नाणेफेक जिंकली, हे विशेष. आगामी कसोटी सामना अवघ्या १० दिवसांवर असल्याने मोहम्मद सिराजला या सामन्यात संधी दिली जाऊ शकते. अशा स्थितीत नबीला संघातून वगळले जाईल, असे दिसते.
प्रतिस्पर्धी संघ
भारत : शुभमन गिल (कर्णधार), रोहित शर्मा, विराट कोहली, श्रेयस अय्यर, के. एल. राहुल, नितीश रेड्डी, अक्षर पटेल, नमन धीर, अंशुल कंबोज, गुर्नूर ब्रार, ऋतुराज गायकवाड, अर्शदीप सिंग, इशान किशन, मोहम्मद सिराज, कुलदीप यादव, आकिब नबी.
न्यूझीलंड : मिचेल सँटनर (कर्णधार),मायकेल ब्रेसवेल, डेवॉन कॉन्वे, जेकब डफी, मॅथ्यू फिशर, मॅट हेन्री, कायले जेमिसन, टॉम लॅथम, डॅरेल मिचेल, हेन्री निकोल्स, ग्लेन फिलिप्स, टिम सेईफर्ट, नॅथन स्मिथ, ब्लेर टिकनर, विल यंग.
वेळ : सकाळी ७.३० वाजता; थेट प्रक्षेपण सोनी टेन १, ३ वाहिनी आणि सोनी लिव्ह अॅप