ॲम्स्टेलवीन : उपांत्य फेरीत पोहोचण्याची संधी हुकल्याच्या निराशेतून सावरून भारतीय महिला हॉकी संघ बुधवारी महिला हॉकी विश्वचषक स्पर्धेत उच्च मानांकित जर्मनीविरुद्ध मैदानात उतरेल. पाचव्या स्थानासाठी होणाऱ्या या लढतीत विजय मिळवून स्पर्धेचा शेवट गोड करण्याचा भारतीय संघाचा मानस आहे.

ही लढत केवळ पाचवे स्थान मिळवण्यासाठी नसून, पुढील महिन्यात होणाऱ्या आशियाई क्रीडा स्पर्धेपूर्वी संघाचा आत्मविश्वास उंचावण्यासाठी अत्यंत महत्त्वाची ठरणार आहे. आशियाई क्रीडा स्पर्धेत सुवर्णपदक मिळवल्यास भारताला २०२८ च्या लॉस एंजेल्स ऑलिम्पिकसाठी थेट प्रवेश मिळणार आहे. भारतीय संघाने या स्पर्धेत आतापर्यंत केवळ एक सामना गमावला आहे. दोन वेळच्या माजी विजेत्या जर्मनीविरुद्धच्या सामन्याचा निकाल काहीही लागला, तरी १९७४ मधील पहिल्या आवृत्तीतील चौथ्या स्थानानंतरची ही भारताची या स्पर्धेतील सर्वोत्कृष्ट कामगिरी ठरणार आहे. भारतीय संघात ११ खेळाडू पहिल्यांदाच विश्वचषक खेळत असून, स्पर्धेपूर्वी झालेल्या दोन सराव सामन्यांत भारताचा पराभव करणाऱ्या जर्मनीविरुद्ध त्यांच्यासमोर कठीण आव्हान असेल.

रविवारी ऑस्ट्रेलियाविरुद्धचा दुसरा फेरीतील अंतिम सामना अनिर्णित राहिल्याने भारताचे उपांत्य फेरीचे स्वप्न भंगले होते, कारण पुढे जाण्यासाठी भारताला विजयाची गरज होती. तीन दिवसांच्या विश्रांतीमुळे मुख्य प्रशिक्षक शॉर्ड मरिन यांच्या मार्गदर्शनाखालील संघाला या धक्क्यातून सावरण्यास मदत झाली आहे. या विश्रांतीमुळे खेळाडूंना पुन्हा ताजेतवाने होऊन मैदानात उतरता येईल आणि संघ जर्मनीविरुद्ध पूर्ण ताकदीने खेळून विजय मिळवण्यावर लक्ष केंद्रित करेल, असा विश्वास मारिने यांनी व्यक्त केला आहे.

भारताने आपल्या मोहिमेची सुरुवात ऑलिम्पिक रौप्यपदक विजेत्या चीनविरुद्ध २-२ अशा बरोबरीने केली होती. त्यानंतर सहा वेगवेगळ्या खेळाडूंनी गोल करत दक्षिण आफ्रिकेचा ६-१ असा पराभव केला. ड-गटामधील इंग्लंडविरुद्धचा सामना अनिर्णित राहिल्याने भारताने दुसऱ्या फेरीत प्रवेश केला. दुसऱ्या फेरीत गतविजेत्या अन् यजमान नेदरलँड्सने भारताचा २-० असा पराभव केला, जो या स्पर्धेत भारताचा एकमेव पराभव ठरला.

भारतीय महिला संघाने १९७४च्या विश्वचषकात उपांत्य फेरीपर्यंत मजल मारून चौथा क्रमांक पटकावला होता. हीच भारताची विश्वचषकातील आजवरची सर्वोत्तम कामगिरी आहे. २०२०च्या टोकियो ऑलिम्पिकमध्ये भारताला कांस्यपदकाच्या लढतीत पराभव पत्करावा लागला होता. त्यानंतर भारताची कामगिरी सातत्याने खालावली आहे.

वेळ : सायंकाळी ६.३० वाजता

थेट प्रक्षेपण : स्टार स्पोर्ट्स सिलेक्ट २, जिओहॉटस्टार ॲप

(संबधित इंग्रजी बातमी वाचण्यासाठी येथे क्लिक करा.)