अहमदाबाद : कर्णधार एडीन मार्करमने (४६ चेंडूंत नाबाद ८२ धावा) गुरुवारी शानदार अर्धशतकी खेळी साकारली. त्यामुळे दक्षिण आफ्रिकेने सुपर-आठ फेरीत सलग दुसरा विजय नोंदवताना वेस्ट इंडिजचा ९ गडी व २३ चेंडू राखून धुव्वा उडवला. या विजयासह आफ्रिकेने थाटात उपांत्य फेरी गाठली, तसेच भारतीय चाहत्यांनाही दिलासा दिला.
अहमदाबादच्या नरेंद्र मोदी स्टेडियमवर झालेल्या सुपर-आठ फेरीच्या पहिल्या गटातील या लढतीत विंडीजने प्रथम फलंदाजी करताना २० षटकांत ८ बाद १७६ धावांपर्यंत मजल मारली. मात्र आफ्रिकेने हे लक्ष्य १६.१ षटकांत अवघ्या एका फलंदाजाच्या मोबदल्यात गाठले. मार्करमने ७ चौकार व ४ षटकारांसह ४६ चेंडूंतच ८२ धावा फटकावताना विश्वचषकातील तिसरे अर्धशतक साकारले. त्याला क्विंटन डीकॉक (२४ चेंडूंत ४७) व रायन रिकल्टन (२८ चेंडूंत नाबाद ४५) यांची उत्तम साथ लाभली.
आफ्रिकेने सलग दुसरा विजय मिळवल्याने त्यांचे उपांत्य फेरीतील स्थान जवळपास पक्के झाले आहे. तूर्तास ते पहिल्या गटात (२ सामन्यांत ४ गुण) अग्रस्थानी आहेत. त्यांची आता झिम्बाब्वेशी रविवारी अखेरच्या साखळी लढतीत गाठ पडेल. विंडीजला मात्र पराभव पत्करावा लागल्याने त्यांना रविवारी भारताविरुद्ध विजय अनिवार्य असेल. कारण भारताने गुरुवारी रात्री झिम्बाब्वेला धूळ चारली. त्यामुळे रविवारी भारत-वेस्ट इंडिज यांच्यात होणारा सामना एकप्रकारे उपांत्यपूर्व लढत असेल.
तत्पूर्वी, विंडीजची एकवेळ बिकट अवस्था होती. कगिसो रबाडा व लुंगी एन्गिडी यांच्यापुढे ते ६ बाद ७१ असा संकटात होते. कर्णधार शाय होप (१६), शिम्रॉन हेटमायर (२), रोवमन पॉवेल (९), रॉस्टन चेस (२) यांनी निराशा केली. मात्र जेसन होल्डर (३१ चेंडूंत ४९) व रोमारिओ शेफर्ड (३७ चेंडूंत ५२) यांनी धडाकेबाज खेळ केल्यामुळे विंडीजने पावणेदोनशे धावांपलीकडे मजल मारली. मात्र तरीही त्यांचा पराभव झाला.
भारत आणि श्रीलंका येथे संयुक्तपणे टी-२० विश्वचषक क्रिकेट स्पर्धेचे आयोजन करण्यात येत आहे. ७ फेब्रुवारी ते ८ मार्च या कालावधीत रंगणाऱ्या या स्पर्धेत यंदाही गेल्या वेळेप्रमाणे २० संघ सहभागी झाले आहेत. भारत २०१६नंतर प्रथमच टी-२० विश्वचषकाचे यजमानपद भूषवत आहे. रोहितच्या नेतृत्वात २०२४मध्ये भारताने टी-२० विश्वचषक उंचावला. आता भारतापुढे जेतेपद टिकवण्याचे आव्हान असेल.
संक्षिप्त धावफलक
वेस्ट इंडिज : २० षटकांत ८ बाद १७६ (रोमारिओ शेफर्ड नाबाद ५२, जेसन होल्डर ४९; कगिसो रबाडा २/२२, लुंगी एन्गिडी ३/३०) पराभूत
वि. दक्षिण आफ्रिका : १६.१ षटकांत १ बाद १७७ (एडीन मार्करम नाबाद ८२, क्विंटन डीकॉक ४७, रायन रिकल्टन नाबाद ४५)
सामनावीर : एडीन मार्करम