कल्याण : कल्याण-डोंबिवली महानगरपालिका सार्वत्रिक निवडणूक २०२५-२६ च्या पार्श्वभूमीवर निवडणूक कर्तव्यावर नियुक्त अधिकारी व कर्मचाऱ्यांना मतदानाचा हक्क बजावता यावा, यासाठी महापालिकेच्या वतीने टपाली मतदानाची विशेष सुविधा उपलब्ध करून देण्यात आली आहे. ही सुविधा ११ जानेवारीपर्यंत सर्व निवडणूक निर्णय अधिकाऱ्यांच्या कार्यालयात उपलब्ध करून देण्यात आली आहे.

महापालिकेच्या सार्वत्रिक निवडणुकीसाठी १५ जानेवारी रोजी मतदान प्रक्रिया, तर दिनांक १६ जानेवारी रोजी मतमोजणीची प्रक्रिया पार पडणार आहे. या कामासाठी मोठ्या प्रमाणावर अधिकारी व कर्मचाऱ्यांची नियुक्ती करण्यात आली आहे. कल्याण-डोंबिवली महापालिका हद्दीत मतदार म्हणून नोंदणी असलेले, मात्र महापालिकेत किंवा बृहन्मुंबई महानगरपालिका, अंबरनाथ नगरपरिषद आदी ठिकाणी निवडणूक कर्तव्यावर नियुक्त अधिकारी व कर्मचारी यांना १५ जानेवारी रोजी प्रत्यक्ष मतदान करणे शक्य होणार नसल्याने, त्यांच्या सोयीसाठी टपाली मतदानाची सुविधा उपलब्ध करून देण्यात आली आहे.

'विशेष टपाली मतदान सहाय्यता कक्ष'

या अनुषंगाने कल्याण-डोंबिवली महानगरपालिका हद्दीतील सर्व ९ निवडणूक निर्णय अधिकाऱ्यांच्या कार्यालयात 'विशेष टपाली मतदान सहायता कक्ष' स्थापन करण्यात आले आहेत. या कक्षांमध्ये दिनांक ९, १० व ११ जानेवारी रोजी सकाळी ९ ते सायंकाळी ६ या वेळेत संबंधित अधिकारी व कर्मचारी प्रत्यक्ष उपस्थित राहून मतदान करू शकतात, अशी व्यवस्था करण्यात आली आहे.