मुंबई : ठाण्यातील घोडबंदर रस्त्यावरील वाहतूककोंडी फोडण्यासाठी मेट्रो १० प्रकल्पाच्या अंतर्गत गायमुख ते फाऊंटनपर्यंतच्या साडेपाच किमी लांबीच्या रस्त्याचे रुंदीकरण करण्यात येणार आहे. सध्या या रस्त्याची रुंदी १८ ते २० मीटर असून ती ६० मीटरपर्यंत वाढवण्यात येणार आहे. त्यामुळे मेट्रो १०च्या खर्चात तब्बल ७१६ कोटी रुपयांनी वाढ झाली असून प्रकल्पाचा एकूण खर्च ८ हजार ५३५ कोटी रुपयांवर पोहचला आहे.
नुकत्याच पार पडलेल्या राज्य मंत्रिमंडळाच्या पायाभूत सुविधा समितीच्या बैठकीत मेट्रो १० च्या मार्गावरील रस्ता रुंदीकरणाला मंजुरी देण्यात आली होती. त्यानुसार नगरविकास विभागाने गुरुवारी यासंदर्भातील शासन निर्णय जारी केला. मेट्रो १०च्या मार्गावरील वृक्षतोड वाचवण्यासाठी तसेच या प्रकल्पाचा कालावधी कमी करण्यासाठी ०.६८ किमी लांबीच्या भूमिगत मार्गिकेऐवजी उन्नत मार्ग करण्याचा निर्णय घेण्यात आल्याने मुंबई महानगर प्रदेश विकास प्राधिकरणाने मेट्रो प्रकल्पाच्या कामात रस्ता रुंदीकरणाचा समावेश केला.
या पार्श्वभूमीवर मेट्रो १० च्या उन्नत मेट्रो मार्गासह गायमुख ते फाऊंटन हॉटेल या ५.४ किमी लांबीच्या घोडबंदर रस्त्याचे ६० मीटर रुंदीकरणासह या प्रकल्पाच्या सुधारित किंमतीस सरकारने मान्यता दिली आहे. २०१९ मध्ये या मेट्रो प्रकल्पाचा खर्च ४ हजार ४७६ कोटी इतका गृहीत धरण्यात आला होता. त्यानंतर मेट्रो प्रकल्पाचा खर्च ७ हजार ८१३ कोटी ३५ लाख रुपये इतका झाला. आता रुंदीकरणाच्या कामामुळे प्रकल्पाच्या खर्चात आणखी ७१५ कोटी ९१ लाख रुपयांची वाढ झाली आहे.