ठाणे : पान स्टॉल बंद करण्यास सांगितल्याचा राग मनात धरून गोंधळ घालणाऱ्या इसमाने पोलीस उपनिरीक्षक किसन कमलाकर भोईर (५६) यांच्या डोक्यात सिमेंटची वीट मारल्याची धक्कादायक घटना चितळसर पोलीस ठाण्याच्या हद्दीत घडली.
गंभीर जखमी भोईर यांना तातडीने टायटन रुग्णालयात नेण्यात आले; मात्र डॉक्टरांनी त्यांना दाखल करण्यापूर्वीच मृत घोषित केले. या प्रकरणी सराईत गुन्हेगार राजू प्रेमकुमार वाल्मिकी (३०) याला पोलिसांनी अटक केली असून, न्यायालयाने त्याला १ ऑक्टोबरपर्यंत पोलीस कोठडी सुनावली आहे.
पोलिसांच्या माहितीनुसार, २४ सप्टेंबर रोजी रात्री सव्वा अकराच्या सुमारास भोईर हे पोलीस कर्मचाऱ्यांसह पोखरण रोड क्रमांक २ परिसरात गस्तीवर होते. सुभाषनगर येथे पान स्टॉलजवळ गर्दी झाल्याने त्यांनी स्टॉल चालकाला विहित वेळेत दुकान बंद करण्याची सूचना केली. त्यावेळी आरोपी गोंधळ घालत असल्याने पोलिसांनी त्याला ताब्यात घेतले.