ठाणे : अपुऱ्या सुविधांनी ग्रासलेल्या ठाणे रेल्वे स्थानक परिसरातील एसटी बसस्थानकातील समस्यांची दखल घेतल्यानंतर परिवहन विभागाने तातडीने सुधारणा करण्यास सुरुवात केली आहे. शिवसेना (उद्धव बाळासाहेब ठाकरे) पक्षाने शुक्रवारी बसस्थानकाची पाहणी करून प्रवाशांना होत असलेल्या गैरसोयींबाबत तीव्र नाराजी व्यक्त केली होती. तसेच १५ दिवसांत परिस्थिती सुधारली नाही, तर आंदोलन छेडण्याचा इशाराही दिला होता.
या पार्श्वभूमीवर परिवहन विभागाने तत्काळ कारवाई करत बसस्थानकात पंखे सुरू केले, शौचालयाची मोफत सुविधा उपलब्ध करून दिली आणि प्रवाशांसाठी नवीन खुर्च्या बसवल्या.
ठाणे शहरातील महत्त्वाच्या एसटी बसस्थानकांमध्ये मूलभूत सुविधांचा अभाव असल्याच्या तक्रारी सातत्याने होत होत्या. विशेषतः ठाणे स्टेशन परिसरातील एसटी स्टँडमध्ये अस्वच्छता, बसण्याची अपुरी व्यवस्था, बंद पंखे आणि शौचालय सुविधांबाबत प्रवाशांमध्ये नाराजी होती.
या पार्श्वभूमीवर शिवसेना नेते तथा माजी खासदार राजन विचारे यांच्या नेतृत्वाखालील शिष्टमंडळाने बसस्थानकाची पाहणी केली. यावेळी शिवसैनिकांनी एसटी प्रशासनाच्या कारभारावर तीव्र टीका करत अधिकाऱ्यांना जाब विचारला. तसेच मुख्य नियंत्रक सागर पळसुळे यांना विविध मागण्यांचे निवेदनही सादर करण्यात आले.
शिवसेनेकडून देण्यात आलेल्या अल्टिमेटमनंतर परिवहन विभागाने तत्काळ हालचाली सुरू केल्या. दुसऱ्याच दिवशी बसस्थानकात विविध सुविधा उपलब्ध करून देण्यात आल्याने प्रवाशांना मोठा दिलासा मिळाला आहे.