ठाणे : निसर्गाची कत्तल करून शहरात काँक्रीटचे जंगल उभारले जात असल्याने ठाणेकरांना वाढत्या उष्णतेचा सामना करावा लागत आहे. वृक्षतोड, वाढते काँक्रीटीकरण आणि पर्यावरण संवर्धनाकडे होणारे दुर्लक्ष यामुळे शहरातील तापमानवाढीचा प्रश्न गंभीर बनत आहे. तापमान ३८ अंशांपर्यंत पोहोचत असून, मध्यरात्रीही ३० ते ३१ अंशांदरम्यान उष्णता जाणवत असल्याने नागरिक हैराण झाले आहेत. या पार्श्वभूमीवर राजकारणी, ठेकेदार आणि सरकारी यंत्रणेच्या कारभारावर प्रश्न उपस्थित होत आहेत.
एकेकाळी हिरवाईने नटलेले आणि तलावांचे शहर म्हणून ओळख असलेल्या ठाण्यात इमारती, रस्ते आणि विविध विकास प्रकल्पांमुळे मोकळ्या जागांचे प्रमाण कमी होत आहे. झाडांची घटती संख्या, सिमेंट-काँक्रीटचे वाढते प्रमाण आणि डांबरी रस्त्यांमुळे शहरात उष्णता साठून राहते. परिणामी, दिवसा जाणवणाऱ्या उन्हाचा त्रास रात्रीही कायम राहतो. सर्वसामान्य नागरिक उकाड्याने त्रस्त असताना प्रशासन मात्र या समस्येकडे गांभीर्याने पाहत आहे का, असा सवाल उपस्थित होत आहे.
झाडे आणि मातीच्या मोकळ्या जागा कमी झाल्याने शहरी उष्णता वाढण्यास हातभार लागतो. वाढत्या तापमानामुळे नागरिकांच्या झोपेवर आणि आरोग्यावरही विपरीत परिणाम होऊ शकतो.
वृक्षतोडीवर नियंत्रण कधी?
विकास प्रकल्पांच्या नावाखाली होणाऱ्या वृक्षतोडीवेळी पर्यावरणीय नियमांचे पालन केले जाते का, याची तपासणी होणे आवश्यक आहे. केवळ वृक्षारोपणाच्या घोषणा करून चालणार नाही, तर लावलेली झाडे जगवणे, जुन्या वृक्षांचे संरक्षण करणे आणि हरित क्षेत्र टिकवणेही तितकेच महत्त्वाचे आहे. विकासकामांच्या मंजुरीपासून प्रत्यक्ष अंमलबजावणीपर्यंत प्रशासनाने पर्यावरणविषयक जबाबदारी पार पाडली पाहिजे, असे पर्यावरण अभ्यासक डॉ. प्रशांत सिनकर यांनी सांगितले.
ठाण्याचा विकास निसर्गाच्या विनाशातून नव्हे, तर निसर्गाच्या संवर्धनातून झाला पाहिजे. राजकारणी, ठेकेदार आणि सरकारी यंत्रणेच्या कारभारावर नियंत्रण ठेवून पर्यावरणाचे रक्षण करणे गरजेचे आहे. अन्यथा काँक्रीटच्या जंगलात ठाण्याची हिरवाई आणि पुढील पिढ्यांचे भविष्य हरवेल!डॉ. प्रशांत सिनकर, पर्यावरण अभ्यासक, ठाणे